【我就是演員】惠英紅任冠軍之夜參謀官　一秒入戲令人驚艷

日前，惠英紅空降內地節目《我就是演員》決戰之夜，受邀擔任決戰夜參謀官。作為總決賽唯一嘅參謀官，紅姐親自指導選手，仲現場同大家分享寶貴嘅表演技巧同心得。

今次係紅姐第二次現身《我就是演員》嘅舞台，第一次佢作為特邀參謀官，驚喜亮相，仲即席為觀眾演出一幕關於「家暴」題材嘅影視作品《兒子的歌聲》，睇到後輩章子怡大叫：「在我心目中她就是一個神！」嚟到「冠軍之夜」，紅姐再一次大晒演技，面對需要挑戰「現場轉變多種人格」嘅選手宋軼時，紅姐悉心指導，而且仲喺僅有嘅時間將呢個「臨時功課」變成十份精彩嘅舞台作品。

喺呢份「臨時功課」入面，紅姐為自己設定為患有老年癡呆嘅老人，雖然着住連身裙，但完全冇局限到佢對角色嘅塑造。紅姐一上台就除咗高踭鞋，彎住條腰，由眼神到情緒變化、語氣到動作嘅場作一百八十度轉變，每一種情緒都處理得恰到好處。短短一分鐘嘅表演，睇到人窒息又感動。