三台主持一齊創業　極速打入內地巿場：把握機會不如創造機會

三個不同電視台背景的主持，點解會走埋一齊？一齊創業又是否咁容易？來自有線的嚴崇天、TVB尤蔭蔭和ViuTV羅沛琪，三個來自不同電視台的主持，最近一齊成立口才訓練工作室，除了本地市場，更在短時間內成功打入內地。

工作室主要提供演講、說話技巧、主持、企業培訓、形象管理等服務，近日成功打入內地市場，已於佛山開設辦公室，將於惠州和廣州落地。「其實一開始都有啲擔心，但我哋將香港主持風格帶到內地，得到政府同企業老闆讚賞，好有滿足感，想令更多人知道香港人靈活變通、有強烈個人風格特色！」前有線主持嚴崇天說。

很多人都很好奇來自三間電視台的人，點解會一齊創業，羅沛琪說：「其實係因為大家理念一致，做幕前太被動，要等人比機會。」他們認為，機會有三種層次：等待機會、把握機會同創造機會，等待機會比不上把握機會，把握機會比不上創造機會，嚴崇天說：「我哋想主導件事，創造更多機會！」

三個人合作，各有優缺點，可以互補長短，尤蔭蔭說：「我地三個絕對係鱷魚頭，老襯底，個個做嘢好似好精明，但其實好多蝦碌嘢。」嚴崇天做事勤力盡責，普通話非常流利，但工作以外的生活智商係零，去一次惠州，唔小心漏低個袋三次，認真大頭蝦；而蔭蔭雖然有一副resting bitch face，但其實為人平易近人，而且留學美國的她，英語流利，負責英語相關工作；羅沛琪出名mean得嚟有急才，但其實mean 人的同時亦mean緊自己，會成日覺得做得到係本份，做得好係應份，所以工作好上心，要準備的資料永遠backup N 份，又會變人肉鬧鐘，提醒大家不要遲到。