【飛虎】黃宗澤拍戲夾斷腳掌變「跛Co」　苗僑偉吳卓羲輪流探望

拍戲時遇上危險場面，除咗一定會做足安全措施，有時要靠後期製作增添視覺效果，唔通拍跳樓戲真係要個演員跳樓咩。不過意外嘅嘢無人想，最近連續幾位藝人拍戲受傷，呢次就輪到正在拍攝邵氏網劇《飛虎之雷霆極戰》嘅Bosco黃宗澤。

12月13日踏入38歲嘅Bosco，最近正忙於拍攝《飛虎之雷霆極戰》，點知呢日就上載瞓喺病床左腳打石膏嘅相片，原來日前拍攝一幕動作場面時，Bosco不慎夾傷左腳腳掌搞到骨折，要入院做手術。Bosco留言話︰「雖然拍攝時出了意外，但是請你們放心，手術非常成功，我會專心養傷，用最快的速度回歸大隊，報答你們對我的愛！」

話晒今個星期係生日周，當然一早有唔少慶祝活動，但通通因為Bosco受傷而告吹。本身一班粉絲幫佢搞咗個生日會，壽星仔都無法到場，只能喺醫院同佢地玩直播，show隻「天殘腳」俾佢地睇。好友們好似三哥苗僑偉、吳卓羲、樂易玲等都有到醫院探望。