【跳躍生命線】何廣沛爆監製留言露玄機　續集勢在必行？

電視劇《跳躍生命線》雖然已經告一段落，但收視大豐收令慶功一浪接一浪，「跳躍四子」何廣沛、張彥博、羅天宇及郭子豪昨晚（5日）出席由馬德鐘自掏腰包舉辦的慶功晚宴，誓言一定要在16日的《萬千星輝頒獎典禮》上奪得「最佳劇集」。

劇中四位的兄弟情令不少人動容，在「最佳拍檔」這項提名亦呼聲甚高，他們直言對手太強勁，未能志在必得，更視《愛 ‧ 回家》做最大對手：「近排佢哋個勢好勁，勁過我哋！但佢哋一年播咁多集，我哋得25集，係輸蝕咗少少嘅！」雖然面對《愛 ‧ 回家》的巨大威脅，但羅天宇都直言不會認輸：「我哋都有信心嘅！」

「跳躍四子」會否再有下文是不少粉絲都很好奇的問題，廣沛大爆監製方駿釗曾經在他的社交網站上留言，寫上「故事未完結」這句充滿玄機的說話。《香港01》亦馬上把監製拉過來「問話」：「你唔會無啦啦講啲咁嘅說話嘅！一定有啲景轟！」監製方駿釗的說話亦留有玄機：「透露得先再透露啦，哈哈！」講完後一片嘩然，監製暗示「未講得」，似乎續集一定勢在必行！

張彥博即將於星期日（9日）開個人演唱會，請來三位好兄弟做嘉賓載歌載舞，他直言這三位嘉賓日理萬機，實在太難「請得郁」。（使唔使出錢請佢哋？）「呢個心照啦！我哋再計，慢慢再計！」他們聽到立即抗議：「搞錯啊！唔係應該有封利是㗎咩？我哋都係睇錢㗎咋，唔係講心，講金㗎！」他搖頭慨嘆：「還一世都未必還到！」