【女人四十】田蕊妮獲封為絕世好老婆　發文澄清杜汶澤無試過破產

TVB台慶節目《女人四十》，由田蕊妮擔任主持，邀請圈中40歲前後女藝人，探討社會對女性步入四字頭所面對嘅改變，引起唔少觀眾共鳴，好多人除咗大讚阿田主持得好好之外，仲大讚佢陪住老公杜汶澤面對所有高低起跌，真正做到「無論環境順逆，疾病健康都甘苦與共」，面對外間高度讚許，阿田呢日亦喺網上親自回應。

阿田同阿澤係圈中恩愛夫妻代表，節目播出後「絕世好老婆」高帽一頂接住一頂，阿田除咗感謝大家支持，呢日就話有少少嘢想澄清下：「《女人四十》播出以來，多謝各界媒體對本人的關注與報導！但我真的要澄清一點，可能是以前的資料有誤⋯⋯我老公真係無破過產！至於賭錢都只是他入行前的歷史！我亦沒有幫他還過任何賭債！我承認我是一個好老婆，但未至於好到咁！哈哈⋯呢個光環實在太大，亦對杜先生不太公平吧！最後衷心感謝各傳媒與觀眾們的厚愛。我會繼續努力！因為女人四十才是一個女人的真正開始！」