張衛健經典作品點止《西遊記》　有角色竟同「小便」有關？

《大帥哥》都未播出，主角張衛健就已經有份角逐「最佳男主角」，可見大台重視程度。張衛健雖然已經有近22年沒有拍TVB劇，但佢早年嘅作品至今仍然令唔少觀眾津津樂道。要講經典，《西遊記》一定係首位，當年首集已創下44點收視紀錄，從而被譽爲改編作品中的經典，口頭禪「Yo！使乜驚呀！」、「我係花果山水簾洞美猴皇齊天大聖孫悟空！」亦相信只有張衛健先能夠演繹出神髓。而《西遊記》作為藍本而改編嘅《齊天大聖孫悟空》，亦可以話係張衛健代表作，再加上當時有謝霆鋒、Twins、梁漢文、葛民輝等人演出，陣容強勁，「噼啪你個隆的咚啊！」、「型到跌渣！」亦成了當年嘅潮語之一。

除咗馬騮仔之外，大家又記唔記得《哎吔哎吔親親你》呢首主題曲呢？92年嘅《我愛牙擦蘇》，張衛健飾演嘅牙擦蘇，同黎姿以及劉小慧發展出一段糾纏不清嘅三角戀，而除此之外，佢喺劇中仲同有林漪娸呢位童養媳，享盡齊人之福。

91年同溫兆倫合作嘅《老友鬼鬼》，張衛健於劇中飾演爛賭交通輔警，為幫梁佩玲擺脫男友被陷害至死，死後因腎臟移植到溫兆倫身上，之後每次只要溫兆倫小便，張衛健就會出現。以題材嚟講，《老友鬼鬼》喺當年都算新鮮，而張衛健於劇中嘅口頭禪「咪當我Robert」、「我哋係醒字派嚟㗎嘛」相信大家都好有印象。

另外，唔知大家仲唔記得「涼風有信，秋月無邊。虧我思嬌嘅情緒，好比度日如年。我雖則唔係玉樹臨風，瀟灑倜儻，但我有廣闊嘅胸襟加強勁嘅臂彎。」呢句金句呢？01年無綫外購嘅《小寶與康熙》，張衛健飾演韋小寶，既煽情又肉麻，周旋於林心如、陳法蓉、朱茵、張茜等人之間，而同劇仲有舒淇同鄭伊健。
 

除大台劇之外，張衛健早前有唔少劇集都曾在亞視播出（外購劇），99年佢同恬妞主演嘅《少年英雄方世玉》為亞視取得最高26點收視，比《還珠格格》更勝一籌，「兩母子」一唱一和如同活寶貝一樣。