林秀怡被傳搭上無綫PA　親認已拍拖兩年：視佢為結婚對象

近日憑住無綫台慶劇《是咁的，法官閣下》而人氣急升，現年27歲的林秀怡 (Kirby)，除了演技備受讚賞之外，她的私生活亦都備受關注，就連坎坷的身世亦被報道。於單親家庭長大並與媽咪相依為命的Kirby，為養家而身兼多職，早前為了醫治患癌的媽媽，仲用晒多年積蓄，絕對是乖乖女一名。她又感激男友於這段期間對她的支持，且愛屋及烏十分照顧她的媽媽。

不過今日竟然有報道指Kirby搭上了一名無綫助理編導Kevin Leung，指二人愛得癡纏兼打得火熱，還被拍到疑似在車廂內咀咀的照片，之後就雙雙返回男方的寓所。成件事寫到好似她背住男朋友偷食咁！然而事實卻並非如此，Kirby接受《香港01》記者電話訪問時表示：「嗰個咪就係我依家個男朋友囉，佢之前係做PA，最近已經升咗做導演，可能因為咁樣令人誤會係兩個人嚟。」

Kirby透露自己同男友拍拖兩年，對感情認真專一的她，當然不會派帽給男朋友啦。她還大讚男友說：「我哋係拍嘢時認識嘅，專一工作嘅男人特別吸引，嗰時覺得佢個樣好型。佢好細心，好文靜又純品，係個暖男嚟，見我忙到無時間，仲會主動嚟幫我執屋，同埋好多謝佢咁照顧我媽咪，我媽咪進出醫院都係佢幫手車出車入。」Kirby坦言經已視男友為結婚對象：「佢好愛我，會將我擺喺第一位，希望30歲前結婚。我都feel到媽咪好錫佢。」而她就笑言男友在她心目中只係第二位，第一位是她媽咪。

一齊睇下Kirby啲靚相啦。