泳兒親自整狗頸圍義賣　向毛孩承諾「相伴一生」

歌手泳兒（Vincy）日前喺自己社交網站上載咗一條短片，片中Vincy着住婚紗、帶上戒指，她說：「最幸福嘅時刻，係摯愛的人為自己許下承諾，從今日開始，無論順境或逆境，富有或貧窮，健康或疾病，我將永遠愛、珍惜你，直到地老天長。」並承諾將永遠愛牠，相伴一生，無錯，泳兒許諾的對象，就是她的毛孩Batman同辣妹。

Vincy最近成立咗個人品牌「V got this」，品牌第一個炮就係慈善義賣「狗狗頸圍」。今次Vincy自資製作咗一系列嘅狗狗頸圍，目的係宣揚「Make a promise, love them a lifetime.」呢個message。Vincy話：「婚姻係一個一生一世嘅承諾；養寵物都一樣，俾佢哋一輩子嘅承諾。希望帶上呢個頸圍就好似戴上結婚戒指一樣，承諾照顧佢哋一輩子。」呢個狗狗頸圍除咗可以喺SPCA Christmas catalog買到，亦都可以上「v.got.this」lG查詢，所有嘅收益扣除成本後將捐給動物慈善機構。而今次首批限量版「make a promise狗狗慈善頸圍」嘅收益將會捐俾SPCA。

唔講唔知，原來啲狗狗頸圍係Vincy親手製作，佢話：「第一次整手作仔賣，揀料都係自己嚟，主要用料係Japanese Organza (日本柯根紗) 同埋Japanese Chiffon ribbon（日本雪紡紗帶絲帶）。都有俾唔同嘅狗仔試，希望佢哋帶得舒服又靚。」

拍攝宣傳片時，Vincy話最難係控制係自己兩隻狗仔，「Batman唔受控、辣妹要用嘢食引誘。其實拍攝嗰日都有啲熱，再加埋地面有熱氣，但係佢兩隻嘢好醒目，影相時時識得爬上婚紗抖涼。」除此之外，Vincy亦都多謝一班好朋友幫手，「我哋朝早七點就開始拍，因為要追日光，大家嗰日都輪流變做狗保母。」佢仲話希望可以多啲司機肯接送啲狗，「因為嗰日call車轉location有啲難，好多司機見到狗狗就擰晒頭。」