【美女廚房】馮盈盈自爆打咗Botox所以讀錯字：我條脷好叻㗎！

馮盈盈 (Crystal) 於今年的無綫50+1《萬千星輝賀台慶2018》上，以一襲真空上陣的超性感晚裝搶晒鏡，而她於昨晚播出的一集《美女廚房》入面，都一樣好搶鏡，今次不是靠性感打扮，而是靠她的口才與急才。同場一齊接受挑戰的靚女嘉賓還有蘇麗珊以及王灝兒 (JW) ，三人都曾經上過該節目兼成為「地獄廚神」，今集她們就要一雪前恥，最後Crystal成功以93分的高分洗甩「地獄廚神」的污名，成為破地嶽廚神。而試食的男嘉賓就有詹瑞文 (詹Sir) 同陳百祥 (叻哥) 等。

Crytal全晚的表現都好出色，廚藝獲得一眾男主持和嘉賓大讚，給予她炮製的美食好高分，而且她還為大家帶來了好多歡樂。當Crystal被叻哥問到知否枱上的紅酒出自那裡，她說：「我覺得似係Old world…『Bordeaux』嗰邊囉。」但卻讀錯了，被詹Sir糾正說：「咩係『Bordeaux』（波爾多）呀？」此時Crystal即笑言：「啱啱打完Botox返嚟呢，啲牙骹好緊呀，讀唔到呢個音。」用自爆打了Botox來解釋，轉數好快，令詹Sir都拍晒手掌。

之後Crystal又被詹Sir發現有嚴重的懶音，當中包括「香」同「鄉」、「乾」同「缸」仲有「光」等字都讀錯了，要乖乖地在詹sir的指導下讀到啱為止。不過當她被詹Sir要求讀「黐線蜘蛛啲蜘蛛絲黐住支樹枝」，竟然出奇地流利兼讀啱晒，連她自己都不禁要認叻話：「我條脷好叻㗎！」

一齊重溫下Crytal喺呢集有幾搞笑啦。