謝霆鋒對港式風味有獨特執著　部分靈感來自媽媽拉姑

謝霆鋒自從愛上烹飪後，每次喺廚房有新搞作都會成為網友熱話。早前佢同快餐店合作推出煎蛋肉醬飽，食客紛紛去挑戰點先唔使食到周圍都係。港式味道又點止一款，霆鋒設計嘅另一款「鋒味洋蔥吉列豬扒飽」亦都正式登場啦。

拍攝廣告當日放飯時，霆鋒就揀咗盒洋蔥豬扒飯，問他點解揀呢款，他就話：「其實豬扒每個地方都有，但香港嘅豬扒好唔同。呢個係好香港、我好細個時候嘅一個飯，係我阿媽好鍾意食嘅一個豬扒，不過以前啲豬扒可能再會多啲洋蔥絲喺上面。」

之後佢一邊食住飯盒一邊同大家解構呢個「豬扒飽」：「我哋做咗一個真係破天荒嘅嘗試，從來未試過，就係做洋蔥豬扒飽，但係個豬扒係吉列豬扒，同埋洋蔥係炸過，crispy onion再加一塊啱啱融緊嘅芝士落個飽，飽上面仲有啲cornmeal，係好好食嘅一個飽。」