【發洩擂台】粗口橫飛網友撐真性情　林曉峰：發洩係唔會哈哈咁笑

香港人壓力指數爆煲，根據最新統計在全球「名列前茅」排名第五，每位港人都積落不少怨氣。ViuTV新節目《GOOD NIGHT SHOW 發洩擂台》選在打工仔怨氣最重的星期一首播，節目由「獎老」林曉峰（阿Lo）夥拍陳俞希（Hailey）以及小占主持，挑戰者將上陣玩多個破壞性的遊戲，挑戰者更展露真性情粗口橫飛！

網上睇足本版

雖然節目在晚上九時四十五分播放，但仍受電視尺度所限，到挑戰者「情到濃時」大家只會聽到小占的「HI你個BYE」聲音處理，未必夠過癮。若然各位想有最徹底的「感觀享受」，可以到官方網站或手機Apps睇足本版，完整呈現挑戰者的嘶聲尖叫。
 

首集請來冷氣學徒肥仔健以及冷氣師傅阿狼亮相，人選經過面試安排有心思，二人先後挑戰反枱、飛身撞牆、更要鬥大聲用氣勢驅動「咆哮戰車」，但到最後要爬上紙箱山爭獎金，兩位挑戰者才有機會硬碰硬，阿狼狠狠地將領先的肥仔健拉落山，充滿火藥味。
 

Hailey：主持都要爆粗

而肥仔健挑戰「谷爆發洩拳」時，在阿Lo指示下爆出「四字真言」，即時多出幾分力氣越戰越勇！一班主持人為求令挑戰者全力以赴，連自己都要爆粗，Hailey搞笑指自己對粗口免疫，不過奉旨在鏡頭前爆粗都是首次，聽到挑戰者講身體器官依然唔習慣，提到挑戰者在節目中「原形畢露」，Hailey都戥挑戰者擔心：「始終要打工喎！盡量唔好開名或者用化名啦。」

林曉峰撐真性情

而前「獎老」阿Lo更會座鎮派獎金環節，挑戰者嬴過對手後最後仍要過他最後一關，才能抱走將近十萬獎金，到最後後仍有機會一舖清袋！對於拍檔Hailey指他在節目中爆粗，他否認是節目效果，笑稱：「大家發洩都唔會哈哈咁笑啦！最緊要係藝人適唔適合呢個形象，令到觀眾開心做到真發洩，始終觀眾睇嘅嘢多咗，要求都唔同。」問阿Lo有否聽到一連串的粗口？他說：「其實粗口得五個字，都係門字加個小、西之類，廣東話係博大精深，啲挑戰者用得好妙。」

阿Lo又指發洩渠道有好多，不應只在網上做鍵盤戰士：「最開心係啲挑戰者玩完成晚，話節目真係發洩到，打爛仲有人執番，真係好治癒！其實我都有壓力，剛剛加入新公司，係抱住就嚟做唔到嘅心情，希望大家多多支持啦！」

最後都要溫馨提示，若然你聽到粗口會打冷震，都係建議追返電視版。