【殺手】台灣拍打鬥戲「驚動」霹靂小隊　陳豪：每人拎住支AK槍

陳豪（Moses）今日（17日）同岑麗香齊齊出席藝術活動，身穿皮褸同牛仔褲的阿Mo型格十足，他自認同太太陳茵媺（Aimee）在藝術方面都不錯，子女也遺傳了父母的優良基因：「大仔而家我哋發現佢啱啱開始鍾意畫，亦都諗住帶佢去好一啲嘅師父呀，希望而家開始培養佢一個正確嘅畫畫fundamentals（基礎），我當然好希望佢鍾意畫。因為點解呢，我本身好鍾意畫畫，我畫畫由細玩到大，咁我太太又係一個graphic designer，咁囝囝鍾意畫畫我諗都係順理成章嘅。」

日前阿Mo與黎耀祥的新劇《殺手》完成台灣戲份，由於打鬥場面太真實，搞到市民誤會，還call警察出動，阿Mo說：「有啲電單車呀，有啲黑社會劈友呀，又攞刀，又攞鐵棍，其實我哋都已經係報晒上去畀個市政府嗰度聽㗎喇，咁有時啲途人都唔知發生咩事嘅。其實警察已經嚟咗轉，第二次嗰衝鋒車嚟，咁變咗佢又唔知發生咩事，咁咪見到呢個『霹靂小隊』出動囉，每個人都拎住支AK槍。」

既然有打鬥場面，碰撞在所難免，不過阿Mo指自己只是有小小淤青同扭親，並無大礙。

早幾日Aimee在IG「投訴」阿Mo，稱香港同台灣「Long distance」好辛苦，催促老公快點回港，阿Mo也笑言：「係呀，冇計啦，我只可以話快啲完成嗰邊嘅拍攝，然之後返嚟，我而家終於完成啦！睇下我工作性質囉，第時啲劇如果全程都要大陸拍嘅話，我自己都冇得選擇，當然最希望就係喺佢身邊，有時同啲細路哥玩又唔想離開呢度呀嘛。」不止Amiee，阿Mo說三位子女也非常掛住爸爸：「一見到Daddy成日就問Daddy幾時返呀，Daddy去咗邊呀，你去邊度咁耐架……會咁問法囉。」

下個月初就是阿Mo大仔的生日，他透露會幫囝囝搞party：「已經安排咗幾個唔同嘅party畀佢，有時成日都諗冇年年大搞，都真係幾麻煩，但我哋又唔會唔搞囉，反而就分開咗好幾個唔同嘅細party幫佢慶祝囉。」