【兄弟】劉穎鏇打死豬「沙包」戲惹爭議　救豬團體抨擊：好噁心

無綫台慶劇《兄弟》昨晚播出了第5集，呢集有劉穎鏇 (Tiffany) 飾演的新角色登場，今次是Tiffany首次正式拍劇，她自己亦都期待，日前已於ig post了她出場呢集的劇照預告自己將會出場。不過，無論是她出場的那場戲又或是她所post的相，都惹來了某些團體和網民的抨擊。事緣該場戲講她將豬屍掛起在擂台上，並當成沙包般用來打拳，結果被本港的《救救港豬 Hong Kong Pig Save》團體於facebook出post公開指責。

該團體以「TVB新劇打豬屍極噁心」為題，發文表示：「電視媒體的製作道德水平令人側目。從畫面中的豬屍，豬豬可能不夠半歲。嬰兒被殺後還要被吊打，如此令人心寒的一幕，在劇中卻只是可有可無，只作嘩眾取寵的橋段。尊重生命，如斯簡單。相信作為香港人的電視台，除了娛樂觀眾，亦有一定的社會和道德責任。」有不少網民都留言話看完呢場戲感到好噁心，亦有網民批評是「銀幕後，最廉價的演員、最低賤的道具」，斥責電視台為了搶收視而廉價消費動物的行為。

對於以上的批評，Tiffany接受《香港01》記者訪問時表示：「我作為一個演員都只係跟返個劇本去做，而無特登去做多咗嘅，個劇本真係咁樣寫，我都係盡能力去跟返劇本嘅要求。其實我知道有呢一場戲嘅時候，都有問過大家嘅，咁佢哋個個都同我講，以前真係有人練拳會打豬嘅，所以我聽到之後就已經無再諗呢件事，只係諗方法點樣去演好呢場戲，因為最終都係想做好啲。」

而該劇的監製林志華了解過有關的指控之後表示：「令到有啲人睇完感覺唔舒服，我講聲唔好意思，呢個並唔係我哋嘅原意。點解會設計呢場戲？場戲係講Tiffany個爹地係個豬肉佬，咁佢無咩學識，又想考驗下個女，睇下佢嘅意志有幾堅定，有幾咁鍾意打拳，於是就叫佢打鬆100隻豬啲肉，完全無唔尊重生命嘅意思。我哋係想將場戲拍得得意啲，都有好多網民留言話幾有趣。我哋能力所限，好難去取悅晒所有人，會有唔同嘅聲音，當然並唔希望有人會覺得反感，下次我哋會再小心啲去處理。」另外，有不少網民就覺得呢場戲是對史泰龍的經典電影《Rocky》致敬，戲中亦有一場Rocky打豬「沙包」練拳的戲。

一齊重溫下呢場咁具爭議性嘅戲啦。