【專訪】黃秋生長遠轉戰歐美影視圈：大家都知我得一條路行！
能夠衝出香港躋身國際影視圈，不是每個演員都做得到。雖然有很多人總覺得香港影視製作，怎也比不上外國，但論演技，影帝黃秋生早就用實力證明，香港演員跟外國演員絕對有得揮。早前他便為英國電視頻道ITV拍攝的懸疑新劇《陌路追凶》（White Dragon）（英譯: Strangers），那在整個拍攝過程中，秋生可有什麼體會？
外國影視製作拍攝時間充裕 演員情緒放鬆
串流平台發展迅速，香港的觀眾多了留意外國劇集，如果有選擇的話，都會寧願看製作相對地較為認真的外國製作。
秋生接受《香港01》訪問時透露，拍攝外國劇集與港劇的最大分別是英國人享受慢活，比香港人少了一份急躁，所以拍攝時間鬆動，令演員工作情緒上都沒那麼緊張。亦因為外國製作認真，而研究的時間比較多，相對來說，香港的拍攝的節奏及速度比外國製作快很多。問到這個是否外國製作比港劇優勝之處？秋生直言節奏快慢跟優勝沒有直接關係，反而在外地工作時間愈長，便愈覺得香港人叻，只不過如果香港的時間及空間方面更充裕，就會更加好：「外國投資額當然比香港大好多，就算所謂嘅細製作，都比香港大，市場大好多就唔使講啦。」
以前港劇市場大 現自我設限：咩都唔講得唔做得！
不少觀眾都認為港劇的質素跟外國製作差距很大，秋生認為本地製作能夠向外國學習的還有很多，其中一樣就是工作模式。曾在無綫及亞視拍過劇的秋生坦言，每間電視台都有不同的拍攝文化，很難用三言兩語解釋，記者請他以無綫作例子，他皺著眉：「咁就冇得搞添啦！講粗口已經絕對唔容許，嗰啲（外國製作）喺現場冇聽到鬧人，每日都好有禮貌，尤其英國人。喺TVB邊有呢啲咁嘅嘢？一早首先就你娘親、你老豆、你祖宗，好暴躁，暴躁唔係好事。」
其後，秋生再反問記者是否覺得差距很遠。他指外國的製作好，剪接、調色、音響做得幾好，雖然長時間拍攝但剪接有很多空間和時間，相反香港就只是流水作業，但責任又不能全歸演藝界的平均質素：「香港市場咁窄！以前唔窄㗎，以前TVB賣到全世界，係而家愈來愈冇，慢慢劇本又衰啲，演員又渣啲、化妝又再是但啲、道具又求其啲，搞搞吓韓國就走上嚟，泰國又有創意，都唔需要睇你。到最後連創意都冇埋，呢啲唔講得，嗰啲又唔講得，呢啲唔做得，嗰啲唔拍得，唔得，唔得，唔得，咩都唔得。道德制高點，越制越高嘅時候就冇得搞。」
不認同香港演員在職培訓 80年代新晉演員肯學
近期無綫播出的劇集《跳躍生命線》及港台製作的《火速救兵IV》獲得不錯的口碑，令觀眾覺得港劇看似有回勇的感覺。不過仍有行內人覺得香港演員的演技未夠質素，主要因為大部分演員都是「在職培訓」。對此，秋生絕不認同，因為香港跟本連「在職培訓」都沒有：「冇在職冇培訓，你見有培訓咩？得在職咋嘛，有人教就叫培訓，如果叫你做，你喺側邊睇，嗰啲唔係叫培訓，我唔見得有培訓，嗰啲叫在職偷師，啲嘢係錯晒！」
提到學院派出來的演員是否更有優勢，在演藝學院畢業的秋生指，在他入行的年代，同期的劉青雲、吳鎮宇、梁朝偉、劉德華等，都不是所謂的學院派出身，但仍演得出色：「點解？因為肯學，肯諗，肯學有很多渠道去學，包括睇電影睇書，睇好多唔同類型嘅嘢，參考唔同演員。依家嗰啲，我覺得佢哋認為只係一個工作，想收工，如果想收工到呢個地步，唔做就最好！」同時，又不能只怪演員，觀眾的水平都有很大影響，皆因有大部分觀眾不懂好壞之分，只覺得情緒爆破就是好戲：「喊又冇眼淚，但有啲觀眾會覺得演技好，點解？因為靚仔，原來靚仔就等於好戲。」
【專訪】陳國邦認港劇水準下滑跟演員有關：「唔係流兩滴眼淚就叫識做戲！」
闖外國影視圈 秋生：我得一條路行！
既然已經成為影帝、視帝及舞台劇帝的首位三棲最佳男主角，彷彿人生成就經已全部解鎖，在於秋生的角度，還有什麼目標想達成？用英語來拍攝外國電視劇對秋生來說，還是第一次，他笑言在這方面自己還是新人：「講返自己語言嘅嘢，都冇特別或者挑戰性。喺西片嗰方面，我仲有好多嘢想做。」提到今次在劇中除了講英文，亦會有少量廣東話，秋生直言這是一個很好的機會，感覺就像免費上學幾個月一樣。
另外，因為在雨傘運動期間不斷在網上撰文聲援而遭封殺，隨後一年都沒有工開。問到將來是否都專注向外國發展，秋生直言：「我將來嘅諗法都係有機會都係以英語為主，冇得向（方向），大家都知，我得一條路行。」
《陌路追凶》第一季共8集，已在FOX Channel及FOX+HK平台播出，每星期播放一集。