大隻仔郭浩皇北上拍打戲周身傷　醫肚要靠網購

藝人郭浩皇（Alex）日前返到內地拍攝電影《潛戰》，身為男主角的他透露這次打戲非常多，搞到成身傷嘅佢更笑言拍完後發現自己的體能有好大嘅進步空間。Alex自小在加拿大生活，是名副其實的「竹升仔」，所以對於整部戲都要講國語對白，令他感到難度相當大：「因為係現場收音，所以每句對白都要好字正腔圓，但有時情緒激動起上嚟難免啲音會歪咗少少，搞到NG。不過，大部分時間大家都做得好好。」

Alex更大讚導演相當心用心，他稱：「呢部戲嘅導演本身亦都係一個好有天份嘅插畫師，所以佢係劇本裏面加插咗500幾幅插畫，係一個好好嘅storyboard，令到演員演嘅每一場戲都大概知道佢想要嘅走位，我都係第一次見到有500幾幾幅插畫嘅劇本。」

大陸網站淘寶出名由家品電器到衣物，統統有得賣。Alex笑言今次拍戲亦見證到它的威力，他笑言：「今次拍攝嘅酒店方圓百里都冇咩嘢買，周圍都比較荒廢，所以我哋每朝都會喺網站買零食同買宵夜，就連我哋有破損咗嘅戲服，都可以即刻訂，第二日就即刻送到，真係超級方便！」