【跳躍生命線】女神俾阿婆鬧死女包　陳瀅：細個為咗玩唔返屋企

「有時你最親密的人，先最難開口，去講你幾愛佢」

陳瀅想表白的不是男友（她自稱單身、冇人追），亦不是講緊閏蜜劉佩玥、蔡思貝，而是由細湊大她的婆婆，拍攝《跳躍生命線》的那一年，她知道婆婆有腎病，她想婆婆接受治療，但婆婆旳想法不同，令她感到很失落，她說：「後生嘅人就係想身邊嘅人留得幾耐就幾耐，因為唔想自己唔開心，呢個就係自私，只顧自己感受，我唔想妳離開令我唔開心...」劇中她與羅蘭姐亦是相依為命，羅蘭姐亦身懷重病，陳瀅拍畢此劇終明白婆婆的心意，「我好想佢睇到呢套劇，等佢知道我想同佢講嘅說話。」

陳瀅自言在以前也經歷反叛期，令婆非常擔心，「其實做孫好容易發老人家脾氣，『得啦，好煩呀！妳』，完全唔會有hard feeling，因為覺得妳真係煩，話妳係應該嘅，但其實老人家聽到係會痛。」陳瀅最記得在中學時代，有一次令婆婆最擔心，「以前讀書嗰陣婆婆覺得女仔返完學就應該返屋企，但女仔大個咗就想出去玩架啦，試過放學冇返屋企同朋友出去玩，玩到夜晚７點幾先返，佢就不斷打俾我，幾分鐘就打一次嚟，我都係冇聽，因為我驚呀，我知佢想我返屋企，但我就係想出去，我覺得自己生活重要啲，所以冇理佢，當我返到屋企嘅時候，我就發現佢坐咗喺廳到，揸住把菜刀，一見到我就鬧『妳個死女包，做乜唔聽電話，去咗邊呀？』一路係咁追住我，佢真係好嬲，佢覺得妳聽個電話都好啦。」

拍完《跳躍生命線》，陳瀅透過劇中羅蘭的角色，找到和婆婆相處的答案，「老人家會有好多擔心，佢會驚我一個人住慣唔慣？冇乜湯水喎，一年冇出劇喎？妳係咪好唔掂呀？成日問我娛樂圈係咪好複雜，叫我唔好俾人呃，我會同佢講『阿婆我好醒目㗎！』；佢睇到報紙寫乜就信㗎喇，就會有好多唔同嘅擔心出現咗，我就同佢講唔好相信啦，話明娛樂新聞妳睇完就算，佢就會反問「係咪㗎？』亦都因為婆婆呢個諗法，我就會諗原來啲人會相信報紙寫乜㗎喎，自己要再檢點啲...佢知我忙，唔會成日揾我，但我教咗佢用facetime，佢一想見到我，就可以見到。」