【飛虎】與荷里活男星Lee Pace多場對手戲　黃宗澤講英文好大壓力

由邵氏兄弟及優酷聯合出品的網劇《飛虎之雷霆極戰》今日（31日）舉行記者會，黃宗澤（Bosco）在劇中飾演一個在英國回流到香港的「鬼仔」，所以需要在劇中講英文：「好難啊，始終第一次用英文去演戲，即係你平時交談就無乜壓力㗎嘛，你講錯嘢都無所謂，但係你講對白，變咗要用另一個思維，而家都開始習慣緊。」

劇組邀請到荷里活男演員Lee Pace加盟，與他有多場對手戲的Bosco表示今天才第一次正式見面，更大讚Lee很親切。（頭先見到你哋喺台上面傾密偈喎！）「佢喺台度同我講：『嘩！架車好靚喎！』Men's talk梗係講吓d車嘅嘢㗎啦，咁就傾咗一陣計。」

日前Bosco於社交網站上載一張自己穿著全副武裝的相片，並形容為「減肥套裝」，有沒有真的減到肥？Bosco回道：「因為第一集拍嘅時候係夏天，咁我就post咗一個話『呢個簡直係減肥套裝』，跟住前幾日見返嗰套衫，咁我就發咗出嚟啫。而家舒服好多，因為好似真係涼啲啦，無嗰陣時咁辛苦，嗰時真係一日輕2、3磅！」