【跳躍生命線】馬德鐘不求個人名譽　盼全體上台奪「最佳劇集」

電視劇《跳躍生命線》收視衝破30點，昨日（30日）舉行祝捷晚宴，馬德鐘表示節目大受歡迎當然不少得整個團隊的功勞：「多謝監製咁用心做呢套戲，亦都多謝編審寫咗個好動人，可令人能夠反思人生嘅劇本。好慶幸可以有幸參與其中，而戲入面每一位演員演技亦好好，所以係好感恩可以有呢個成績。」

他表示自己在家收看劇集時反而比親身拍攝時更加感觸良多，尤其最近看完一場講述傑仔俊仔兩兄弟，發現在哥就是當年令他們決志做救護員的人，並在天台與他相認令他不禁流下淚來：「當然睇劇本已經會覺得好感動，但係拍嘅時候要兼顧好多嘢，同埋片尾嘅獨白都係我去錄，錄嘅時候當然亦會帶咗我戲入面嘅情感落去，估唔到當兩件事合埋一齊嘅時候個爆炸力係咁大。」他說最能夠觸動到內心深處的是這場戲的獨白配合得很應景：「個獨白就係，人生除咗無常同意外，呢兩兄弟仲係有希望同奇蹟呢兩樣嘢。」

他說劇集開始進入全劇高潮，希望觀眾能繼續支持香港電視劇：「希望可以攞到更好嘅收視，可以喺頒獎禮攞到『最佳劇集』！」馬神自己有沒有信心問鼎最佳男主角？他謙虛稱：「我自己唔敢奢望咁諗，我希望台前幕後出咗咁多力，可以齊齊整整大家所有演員企喺度攞呢個『最佳劇集』獎！」