朱千雪女神Look現身馬場　男友甚少支持戲劇作品唔通怕睇佢咀咀？

好快就到TVB台慶嘅日子，當晚全台藝人都會盛裝出席，頒獎典禮上爭妍鬥麗兼爭獎。不過今年朱千雪（Tracy）完全無戲劇作品播出，台慶夜可以輕鬆現身志在參與。呢日佢以全白高貴女神造型現身馬場出席活動：「英國每逢大型賽馬活動，大家都鍾意跟傳統盛裝出席，尤其女士們更會悉心打扮。所以我揀選一條白色長裙，配上特別設計嘅頭飾！剛才嚟嘅時候經過一個商場，市民見到我呢身造型都好驚喜，好似穿越時空一樣相當有趣！」

問到入馬場的心情，Tracy話:「現場氣氛非常熱鬧，可與過萬人一齊為心水馬匹打氣亦係一件樂事。」原來Tracy同馬都曾經結下不解緣，佢曾經為拍攝旅遊節目，於澳洲學過騎馬，森林裡面慢慢踱步，可謂初步掌握策騎技巧，並感覺像融入大自然般十分寫意，但已經係五年前嘅事啦。佢仲話若果日後拍戲需要騎馬，自己相當願意嘗試。

不過要睇Tracy嘅戲劇作品應該仲有排等，因為佢正在修讀法律課程：「我當然都捨不得大家，從小到大自己都是一個普通人，無想過可擁有一班粉絲對我咁好，無論我鍾意什麼，他們都支持我！未來的事將來再算吧，目前最重要是先專心完成degree課程，因為我是一個不太能夠分心的人！」

工作學業不能共存，好在感情方面Tracy同男友已經好有默契，關係相當穩定。佢仲大爆原來男友甚少睇佢所拍嘅劇集，唔通怕睇住女友拍親熱戲接受唔嚟？Tracy笑言：「因為男友已經很了解現實中的我，所以毋須通過電視來加深了解，反而他比較多留意我的訪問或其他節目！」