【ONE PIECE】租倉儲50萬珍藏　「港版路飛」狂熱背後的感人故事

夢想是甚麼？夢想是每日朝9晚5日做夜做，或是工作結婚生仔退休安老院終老？有否記得自己兒時的夢想是甚麼，又曾否為夢想而奮鬥，那怕只能實現這個夢想的內容中百分之一。《ONE PIECE》的出現，正好慰藉了一代人心靈上的空位，同時也給予了年輕人追夢的勇氣。此次訪問中的2位《ONE PIECE》Cosplayer，正是因《ONE PIECE》而去追夢。

Viu.com（黃Viu）播放中的《ONE PIECE》（香港釋名：《海賊王》），說的正正是一個追尋夢想的故事，主角Monkey.D.Luffy（香港釋名：莫奇·D·路飛）因兒時與偶像「紅髮」撒古斯一個約定，而選擇出海尋找「One Piece」秘寶以及立志成為「海賊王」。漫畫由1997年連載到今已有900多期，而漫畫由1999年第一話算起也有800多話，《ONE PIECE》由漫畫、動畫以至角色的周邊商品、Cosplay在不知不覺間風行世界。故事經歷足足達10年之久，看著路飛的經歷，與夥伴的相遇、暫離、失去至親，一切看似瘋狂而又合理的行經，彷彿路飛就是代替了讀者去歷險和追尋夢想。

「我要成為海賊王 ！」這句口號，除了是《ONE PIECE》中路飛經常會說的，同時也是港版「路飛」林兆豐的座右銘。林兆豐不止是夢想打造自己的一首船，更在9年收集了過10萬件《ONE PIECE》的收藏，Figure、毛公仔、聲優簽名等都有，又因為此收藏品與日俱增，早些年特地為了收藏品租用一個貨倉存放。他更表示，該貨倉也用作Cosplayer朋友之間的「部屋」使用，其中張嘉榮（Gerund）、嚴國平（Terry）也是「部屋」的常客之一。要數《ONE PIECE》Cosplayer的表表者，一定不少得這3位。

叫我路飛就得啦，船上面個個都咁叫我。

林兆豐，又名「路飛」。他自言由中一起開始就已經喜歡上《ONE PIECE》，自然長大後就成為了一個朋友同事眼中的《One Piece》迷。為甚麼他會被同事稱為「路飛」？大槪是他熱愛《ONE PIECE》的程度絕對不止於買漫畫、睇動漫這樣簡單。他自言由小開始就有收藏《ONE PIECE》週邊商品的習慣：「我畢業出嚟做嘢之後，一個月大槪會使3，4千蚊買週邊。因為屋企唔夠位，宜家仲租咗個千四呎嘅倉擺。（啲收藏總共咗幾錢？）未計升值都差唔多50萬。」

我覺得有啲嘢唔係淨係為咗生活，唔係話要有樓先得。我想喺呢段時間，為咗自己想做嘅嘢做多啲。

總數花費50萬的《One Piece》收藏品，月租1400呎貨倉，嚴如一個小型博物館。林兆豐解釋這個收藏品倉由來：「點解我哋要開呢個『部屋』呢，就係我想我哋嘅Cosplay好似一家人咁。好似《One Piece》入面路飛佢哋隻船咁，我哋都有一隻屬於我哋嘅船。」除此之外，這個「部屋」亦是儲存大型Cosplay道具的好地方。「如果有朋友屋企唔夠位擺點算呢，其實個『部屋』都幫到佢哋。」

俗說都話：「玩物喪志」尤其多是出於長輩口中。「我媽媽都幾特別，因為佢從來都唔要求我去做啲咩嘢。佢只會話：『你想做咪試下囉。』總之唔好煩到佢就得，哈哈哈。不過佢都好支持嘅，例如我以前買公仔，佢會話我：『唔好成日買公仔啦，使咁多錢。』但係有時佢出街見到就會問我，有《ONE PIECE》喎，你要唔要吖？跟住我都未講要唔要。佢就會話：『得啦，我買返嚟先啦。』佢係比較搞笑啲，哈哈。」

「路飛」的夢想，同時也是對去世爸爸的承諾

夢想，看似距離很遠，卻又可以伸手觸碰到。自小林兆豐就已經跟爸媽感情很好，林兆豐回憶說：「嗰陣時我爹哋鍾意揸車，又好鍾意坐船，再加上我舅父又係船長，所以後來我就入咗航海學校讀書。」就連他的夢想也是自己駕著船帶家人一起航海旅行。不過讓他遺憾的是，年前因為一場車禍以至林爸爸離世。在林兆豐爸爸離世之時，當時林兆豐就對他作了一個承諾。

「我認承咗我爹哋要做船長！呢個承諾係佢臨走嗰時我同佢講嘅。其實我初初我出嚟做嘢嗰時，都有講過。當然我到考到個船長牌仲有一段時間，因為考個牌都差唔多要10年時間。第二樣嘢係，我覺得，因為爹哋係突然間車禍走咗，所以變咗我已經冇辦法帶到佢出海去一次旅行。」說罷林兆豐苦笑了一下。「其實佢哋都唔係好著緊呢個承諾，因為知我讀書都係麻麻。」可能在林兆豐父母眼中，這個承諾看似兒戲，但對林兆豐本人來說卻無比重要。在成為真正的船長的路途中，先「成為」《ONE PIECE》中的海賊團船長，亦未嘗不可。

本來我都係扮路飛㗎！但係識咗佢之後，就俾佢『慫恿』咗做烏索普（Usopp）。

坐在林兆豐身旁的張嘉榮（Gerund）也是一名《ONE PIECE》迷，張嘉榮說起2人相識的經過，原來也是經由動漫Cosplay活動而認識，及後經「路飛」提議後就開始了Cosplay烏索普（Usopp）。雖則張嘉榮的原意並不是Cosplay烏索普，不過從中他亦漸漸發覺自己與烏索普也有相同特質。「男人有時候面對某啲事係唔應該逃避，雖然佢（烏索普）都係一個鍾意逃避嘅人。我細個都鍾意逃避問題嘅，但係睇得《One Piece》個價值觀都會慢慢改變。因為《ONE PIECE》入面，烏索普以往講嘅大話（例：在南海與巨大金魚戰鬥、「我有8千個部下」)都已經慢慢成真。我係度諗，如果我好似佢咁，以往講過嘅大話好似佢咁，努力就會成真，咁就好啦。」

不要總是着眼於失去的東西，失去的東西是不會回來的，問問自己你現在還剩下甚麼！

這一句「甚平」中說出的對白，對張嘉榮（Gerund）可說是感觸最深。「都同我細個嘅時候經歷有關。我試過得到重病（一型糖尿病）入咗醫院，嗰段日子都好唔開心，但係畀到精神支柱我嘅就係《ONE PIECE》呢個漫畫。我記得當時喺個病床度做嘅係咩呢，就係睇《ONE PIECE》。其實點解到宜家都咁熱愛《ONE PIECE》呢？都係因為佢喺我難關嘅時候陪住我最耐時間。」及後張嘉榮又因熱愛《ONE PIECE》的關係，又在「海賊王主題餐廳」工作。

夢想是甚麼？或者《ONE PIECE》動畫中出現的開場白能夠解答：

這世界...沒錯！一個追求自由任憑選擇的世界，就在我們的眼前無限地延伸，如果我們的夢想可以引導你的方向的，就去追尋吧！在名為信念的旗幟下。

追尋夢想就是應該如《ONE PIECE》中的路飛一樣，想做就去做，在追夢中不斷努力朝著目標前行。

場地提供：香港海賊王餐廳
攝影：梁碧玲