聶遠為拍《延禧攻略》開始護膚　男人40學敷面膜

好多時演員都會為角色而有所犧牲，減肥增磅剃光頭又或者將秀髮剪短已經係基本，喺《延禧攻略》中飾演乾隆嘅聶遠，日前接受《魯豫有約一日行》訪問時，就提到當初收到《延禧》劇本之後，毫不猶豫就答應製作人于正，並問對方有乜要求。于正當時就指聶遠因為太瘦，導致頭上的青筋比較明顯。青筋呢樣嘢，同疤痕甚至皺紋一樣都係咁難搞，但聶遠為做皇帝，不惜飛到海口，「找了一個針灸大師，用針一針，血就流出來。」放血！而且係頭！萬一失手咁點算？佢就好似無咩諗過，「他說是有點好處， 但我覺得也沒什麼用。」結果大家喺劇中見到嘅乾隆，仍然係有唔少青筋。

除咗青筋之外，其實于正對聶遠嘅皮膚亦都有少少意見，「以前我真不保養，我覺得是個習慣、是一審美問題，我以前真不太注意，但現在因為我們還踩着青春的尾巴，還是要注意一點。」節目花絮中，聶遠更敷着面膜出鏡，十分懂得保養。至於點解放血都要接《延禧》呢？聶遠話睇完劇本之後，覺得角色好、劇本好，所以早就認為《延禧》會係一部好劇，只係冇諗過佢會成為爆劇。