【迷失假期】俄仔Ansheles處男拍劇有感情戲：但唔多機會抽水

「俄仔」Artem Ansheles自從打入香港市場後，工作以綜藝節目及代言廣告為主，不過其實Ansheles去年為暗暗地為ViuTV劇集《迷失假期》供獻出第一次。劇集講述三個有著不同文化背景、不同目標同理想嘅年輕人，於香港一間窩囊旅館遇上並互相影響，劇集去年底已經拍畢，但結果放足一年才播出。

身為一名俄仔，Ansheles嘅中文程度雖然唔差，但如果要拍劇的話又夠唔夠用呢？去年他為劇集在旺角拍攝外景時，雖然化行妝，但仍然有不少途人認出，並紛紛上前要求合照，足見俄仔魅力十足。Ansheles指自己於劇中飾演烏克蘭人，由於政治問題，所以非法滯留香港。「所以我最驚係警察，就好似呢日講我在街頭表演時，因為有警察所以要走佬。」問到可有感情戲時，Ansheles就話：「我好鍾意一隻雞，但我哋唔多機會抽水……」Ansheles口中的雞係指妓女，睇嚟佢真係香港文化有著深入的了解。
 

Ansheles表示於劇中對白唔算多，所以唔係好擔心。「第一次拍戲，所以演技會擔心，不過真係好開心，聽日係最後一場我怕禿頭會喊。」俄仔大讚工作人員細心，不時教他走位等拍攝時要注意的事情，為了感謝大家，他趁著空檔時，買了一大袋飲品以及魚旦等小食「萬歲」，非常識做。近年Ansheles工作不斷，問到是否收入大增，他指收入確係有增多，有時甚至忙到連飯都無時間食。「但我唔想太商業嘢，所以努力拍多啲自己嘢。」