羅仲謙唔送花零心思　楊怡話撻着全靠一隻豬：唔知點解睇中佢

楊怡自從同羅仲謙結婚後，為生B而減少幕前工作，而老公羅仲謙亦唔介意辛苦少少工作，努力賺錢，務求令老婆可以好好享受人生。楊怡早前接受港台節目《Made in Hong Kong》訪問時，提到二人當年拍攝無綫劇集《On Call 36小時》的撻着過程。「都唔知點解嗰時會睇中佢，真係好奇怪，因為同佢係風馬牛不相及嘅人，大家都覺得我同馬明係最夾，但就因為呢個劇而開始了人生新一頁。」

楊怡回想每當拍夜戲時，羅仲謙都會問佢想食乜宵夜。「我哋生日差兩日，佢知我助手有幫我搞生日會，於是就提議不如一齊搞，最後係買咗隻燒豬一齊切、請晒全廠人食。」生日竟然唔係食生日蛋糕，而係食燒豬，羅生羅太又真係正喎！楊怡話自己當時都幾全心投入工作，所以根本感受唔到羅仲謙對佢有意思，直到劇集差不多拍完，「發現呢個男仔有啲嘢，之後大家一齊去Halloween Party。」

對於羅仲謙，楊怡雖然嫌對方去旅行唔出門一刻都唔執行李，有時甚至為求方便連篋都唔拎。「但佢會為咗我而拎背囊，因為我將啲水、旅遊書、遮塞晒比佢拎。」楊怡之後更笑晒大讚老公孝順又唔會亂花錢，亦指自己婚後比以前開心好多。提到近年羅仲謙頻頻北上賺人仔，楊怡透露自己都會去探班，但頂多都係逗留四至五日，因為唔捨得屋企兩隻狗。「我去其實係阻住佢，因為佢日日都要健身。」

節目主持人指二人不時在網上放閃，又大讚羅仲謙為楊怡花了不少心思製造驚喜，但楊怡聽到之後，竟然搞笑問：「請問佢做過咩？」她指羅仲謙唔係一個會送花、會花心思的人，並表示自己向老公投訴時，對方都會以「細水長流」作為藉口。「生日、結婚周年我問佢有乜表示，佢話『唔使啦，唔好浪費錢，送花畀你又話浪費』，聽完佢講，又真係覺得啱喎。」當你真係好愛一個人嗰時，歪理都完全可以合理化。
 

楊怡、羅仲謙晒恩愛逐格睇