【你咪理，我愛你】毛舜筠熟讀對白有原因：工作人員推軌都辛苦

王祖藍最近首次執導賀歲片《你咪理，我愛你！》，碌盡人情咭搵嚟多達60個主角參與演出，當中包括曾在08年於《畢打自己人》合作的影后毛舜筠。毛姐於戲中有多種身份，而呢日佢係律師一名，正式拍攝前，毛姐重覆練習走位同對白，亦不時與工作人員檢查拍攝時邊個對白該面向哪一個鏡頭，十分認真，她接受訪問時表示：「因為差不多自己講晒對白，一shot落我鍾意熟啲，如果我口窒窒，工作人員推軌都辛苦啦，我十年都係咁，將對白消化過、好熟咁入場。」影后的態度就是熟能生巧！

毛姐於《你咪理，我愛你！》有多個身份同造型：中女、外母 、律師、失婚婦人等等，對她來說也是一個突破。「其中一個中女造型上圍有50F，係我自己度出嚟，大家都覺我好好笑。」除了僭建驚人上圍之外，毛姐亦為電影又唱又跳，感覺好玩又新鮮。「我好想支持新導演，因為《畢打》時已經認識祖藍，加上佢第一次做導演，自己本身好支持新導演，所以一定要撐。」毛姐大讚祖藍雖然首次執導，但拍攝指引十分清晰，事前溝通亦做到足，唔需要大家估估吓。
 

演員拍戲難免會遇上通宵埸面，毛姐指《你咪理》由於有不少講及香港景點的戲入，為將就場地借出，通宵是少不了，但慶幸幾次拍通宵戲時都十分精神，問到是否與平日作休有關，毛姐就話：「我好少夜瞓， 就算夜瞓咗我都要瞓返夠，好多我呢啲年紀嘅人都會瞓得好少，但我就點都8到10個鐘。唔拍戲同屋企人，無特別消遣，再加上自己喜歡入廚，飲食方面易啲控制。」

身為導演嘅王祖藍，呢日在片場忙過不停，但他表示拍攝十分順利，完全超出他所想所求：「一開始係最怕毛姐同獎門人嗰場戲，因為他們都是有經驗的演員，怕會唔收貨，過了他們一關我已完全無壓力。」能夠在20個工作天完成拍攝，祖藍拍演員做足功課到場也十分重要，特別係《你咪理》有不少唱歌跳舞的埸面。問到會否擔心票房成績，祖藍表示過往也不能控制劇集收視，故不會太著緊。「盡咗力，今年都有六、七部一齊打，我有一定信心，因為有好多估唔到嘅嘢喺入面。」