【開心速遞‧專訪】焦浩軒指四子排戲free style：畀導演叫停我哋

講起焦浩軒呢個名字，大家可能會覺得比較陌生，不過如果話係無綫處境劇《愛‧回家之開心速遞》入面的阿壯，有睇呢套劇的觀眾同網民就一定會知道喇。焦浩軒於2013年加入第27期無綫電視藝員訓練班，畢業後正式入行，並於2016年播映的劇集《鐵馬戰車》中飾演黃德斌仔仔杜啟聰一角而令人留下印象，但論入屋程度，都不及阿壯呢個角色。除了拍劇，浩軒亦有主持不少綜藝節目，以演員和主持的身份雙線發展，最近就拍了新劇《解決師》。

原來浩軒從小已經想做綜藝節目的主持，入行後更以獎門人曾志偉為目標：「我好鍾意搞氣氛，好enjoy做host嘅感覺，能夠令人開心我會好有滿足感。有監製問我想做主持定係做演員，其實我兩樣都想做，兩方面都好有興趣，作為一個新人可以有愈多嘗試係好事嚟。」至於拍劇方面，有份參演《開心速遞》的他形容拍攝過程是好舒服且自由度好大，全個劇組都合作得好開心。他與同劇的周嘉洛、吳偉豪以及馮奕森最多對手戲：「我哋排戲好free style，發晒癲咁，有時會畀導演叫我哋『好喇，夠喇！』好好玩，畀我哋好大自由度去發揮。」

入行5年的他自覺一路以來都好幸運，工作機會不斷，前年還演出了舞台劇。問到他可會想有日可以當上主角，他說：「咁如果有機會做主角當然想啦，不過都明白到呢行好講運氣際遇，要靠好多嘢配合，我仲係新人，唔介意等，亦唔會因爲自己個角色得一句白又或者無對白而唔開心，最緊要係自己嘅演技有進步，要增值自己。」

他在演藝路上除了主力幕前的演出，其實對幕後的工作都一樣有興趣同研究，還會主動去搵監製：「一年前我同朋友仔開咗間production house，至今拍咗十幾個廣告，我有拎啲作品去搵監製畀佢哋睇，等佢哋可以見到我嘅進步。例如我每年都會搵一次家豪哥，有主動去爭取有無咩工作機會，TVB太多後生仔喇，競爭好大，自己一定要積極啲先得，肯努力係最基本嘅。」

一齊睇下浩軒喺《開心速遞》入面嘅花絮同埋其他靚相啦。