【殺手】龔嘉欣拍打戲斷手指筋：每日深深感受到「十指痛歸心」

演員可以喺唔同作品中，經歷唔同角色人生，仲可以嘗試不同職業。飾演醫生律師要背大量專有名詞，消防飛虎消耗極大體力，有時仲會受傷添。TVB新劇《殺手》有大量打鬥場面，繼黎耀祥及林利相繼受傷後，龔嘉欣呢日亦喺IG宣告手指斷筋，真係聽到都覺得痛呀﹗

嘉欣喺新劇中有連番動作場面，首次做打女加上戲服只有BRA TOP熱褲魚網襪，想做保護措施都無處可加，之前已經上載過一張背脊貼滿膏藥嘅相，呢次就更為嚴重﹗嘉欣上載包扎住右手尾指嘅相片留言話：「我係傻傻地嘅，拍打戲拍到手指斷咗筋都唔知，仲要幾日之後先睇醫生。雖然依家每日都深深感受到乜嘢叫「十指痛歸心」不過我頂得住喎﹗殺手係唔易做㗎嘛，盡量做好佢啦，唔使擔心我。幫我打吓氣OK㗎啦。」