吳若希結婚一周年老公掛住瞓　神回應：梅艷芳生忌？

結婚係一生一世嘅事，依家好多人都會揀個好意頭嘅日子結婚，例如11月11代表一生一世，520代表我愛你，而10月10就即係十全十美。去年雙十節吳若希（Jinny）同老公Alex簽紙註冊，正式成為合法夫妻，話咁快結婚一周年啦，唔知佢地點慶祝呢？

尚記得去年Jinny未婚產女，然後選擇雙十節返唱片公司簽紙簡單成婚，當時佢留言話：「10月 10日，好日，簽個字，請叫我何師奶～今日我倆一切從簡在唱片公司，在律師同老闆 Herman 及一些好友見証下，與 Alex 正式結婚～希望大家可以祝福我倆，像結婚誓詞一樣愛護及包容大家，令這段婚姻得到真正的美滿。」

結婚一周年Jinny中午就出咗個post，配圖係佢隻戴上婚戒嘅左手，地點係錄音室喎，原來佢無放假繼續開工。Jinny表示：「結婚一週年，是身邊朋友，粉絲提醒我，然後我在工作前打電話給某人問，『今天是什麼日子？』誰知道某人答『梅艷芳生忌』，然後我告訴某人『是我結婚週年紀念』某人：『你結婚關我什麽事？''』」嘩﹗何生唔係咁大膽掛。好在Jinny有解答大家疑雲：「好消息是，某人叫做Kellyjackie！壞消息是，我老公也不記得今天是我們結婚週年，因為他到現在還在睡覺。」仲有幾個鐘時間，希望何生識做啦。