【開心速遞】阮政峰自豪出身兒童組：只要用心去演戲一定會睇到

無綫處境劇《愛‧回家之開心速遞》自開播以來一向收視都唔錯，亦令當中不少角色成功入屋，連帶演出的演員亦愈來愈多人認識，在劇中飾演池子孝的阮政峰就是其中一人。政峰自言從小已經好憎讀書，但成為演員後背劇本卻完全無問題，他說：「我可以一個英文字“when”背4個鐘都背唔到點串，連我阿嫲都背到喇。而讀劇本就可以背得好流暢，全程都好享受。」他於2011年第25期無綫電視藝員訓練班畢業後正式入行，最初加入兒童組主持《放學ICU》。

他對於自己出身於兒童組感到自豪：「兒童組係一個好好訓練嘅地方，可以試好多嘢，有小劇場過戲癮，又有好多好好嘅前輩幫咗我好多，我哋有句說話係「兒童組出品必屬佳品」，所以我要做好自己唔可以失禮。」到了2012年政峰憑住劇集《心路GPS》中飾演張俊傑 (Sky) 一角而嶄露頭角。政峰坦言當時都會想「多啲人認識我就好喇！」隨住角色的受歡迎，他亦心雄起來：「個人變得囂喇，但自己唔覺嘅，淨係好想攞多啲人嘅目光，想出位，想多啲人認識同埋討論自己。好彩得一班前輩佢哋提醒我，我先及時醒覺。」

唔少人都話做藝人是捱出來的，政峰入行至今有好多演出機會，他自覺算是幸運的一個。不過，他也經歷過事業低潮期，試過足足9個月無工開。他說：「大約係5年前嘅事，嗰段日子好難捱，雖然算係一個過渡期，由兒童組轉去劇組，但9個月真係好耐，當然會唔開心。因為之前明明仲有好多工作，變咗無工開，覺得好失落，靠底酬同埋儲落的積蓄過活。咁我都有去學嘢增值自己，去學唱歌、修讀演藝課程、練武術同魔術。」最後他終於等到了於劇集《張保仔》中演出一角，即使只有十場戲兼要剃光頭都好感恩。

之後他就加入了《八時入席》劇組，原來一開始只得幾場戲份：「當時套劇嘅演員已經埋晒班，試晒造型，係開廠前兩、三日先有PA通知我話我有份，角色係道具同事，我心諗『係咪又係啲行行企企，之後突然無咗我，唔要我嘅？係咪出完無耐又走嗰隻？』好唔想係咁樣。我個角色要自己度造型，反而畀到好多空間我去發揮，我同拍檔李霖恩又好有默契，拍完第二場戲之後，編劇就覺得可以再慢慢寫落去，於是我嘅戲份就愈來愈多喇。」

然而，後來開拍的《開心速遞》原本亦沒有預他的，政峰說：「同《八時入席》係同一個監製，但今次就無我份，好失落。我主動去問監製，陰啲陰啲咁叫佢畀我入返去吖，話我想同周嘉洛、馬貫東兩個兄弟一齊開工。最後監製親自打嚟叫我幫手話『戲唔多㗎，無《八時》咁多』，但係我已經好開心，我深信只要用心去演戲，人哋一定會睇到。」政峰坦言曾經試過心雄變得囂張，到要跌返落嚟再慢慢行，令他更加珍惜每個演出的機會，且時刻保持住一顆謙卑的心。