【延禧攻略】聶遠帶埋豬蹄微服出巡　親撰感謝信予影迷超窩心

《延禧攻略》在內地雖已播出大結局，但一眾演員魅力不減，就好似呢日飾演乾隆嘅聶遠，重返《延禧》拍攝場地之一嘅橫店影視城舉行見面會，適逢十一黃金周，加上見面會地點明清宫苑入場費只係百多元人民幣，結果整個明清宫苑逼到插針都插唔入。

聶遠以恤衫西褲現身，簡約又大方得體，但由於現場工作人員全部都係以古裝打扮，令佢即時變得格格不入。聶遠入場時，經過長長嘅紅地氈，近萬名影迷於兩旁不停尖叫，場面極為墟陷。不過呢啲對於身經百戰嘅聶遠來說，完全係小事，沿路不停揮手之餘，亦有簽名合照，親和力十足。見面會期間，聶遠被問到是否經常教新世代演員做戲時，佢就話演員沒有好壞之分，自己亦未有教人的資格。「只是把自己走過的路、經歷過的事告訴他們，讓他們少走彎路。」
 

之前被網民稱為「大豬蹄子」（原指男人善變、沒一個好的，但當聶遠求解時網民開玩笑「欺君」指讚佢靚仔）嘅聶遠，喺見面會上送出多隻簽名豬蹄畀粉絲，但講到最貼心嘅一定係佢寫下感謝信畀影迷會：「非常幸運遇見你們這群小弟、小妹，不管你們身在何處，希望你們可以健康！快樂！心想事成！我也會繼續堅持本心，積極向上，也願我們一起成長、一起進步！」