【再創世紀】「露股」戲內地版被Cut　黃子雄：始終港劇比較保守

「無綫御用有錢人」黃子雄在新劇《再創世紀》飾演香港首富胡楓的兒子，雖然觀眾對他演「富貴人家」經已見慣不怪，但黃子雄這次演玩世不恭的二世祖入型入格，發現迷債爆破時驚嚇表情亦演得相當逼實，他更不惜在劇中「露股」，被不少觀眾大讚「有驚喜」。

日前《再創世紀》中劇情交代他購入大批迷你債券，卻撞正美國經濟危機，所以蝕本。於是他聽從助手的建議，盼望美國政府會出手相救，所以決定繼續借錢「填倉」，希望能翻身渡過難關，最終欠下百億債務。此時他不單止瞞著正在醫院養病的胡楓，在家族公司生意造假帳「填氹」，並在這個危急關頭仍相約𡃁模到酒店大玩SM，結果搞到自己全裸死在床上。黃子雄為了劇情更逼真，更在床上大方「露股」，但無奈這一幕只是香港觀眾的「獨家福利」，有大陸網民發現後就留言大呻好後悔看了愛奇藝所謂的「全集」，仲話感覺被騙，打算重新看來一次無綫完整版。

問到黃子雄是否知道自己戲份被刪，他笑言：「預咗嘅，其實唔止露股，拍嗰陣仲大膽連SM都玩埋。兩個𡃁模仲用皮帶箍住我個頭，尺度都幾大。〈算唔算從影以嚟最大膽？〉都算呀，其實拍嗰陣露得仲多。〈咁事前有無Keep下？〉我一向有做開Gym，但無為呢個角色去做，因為始終呢個二世祖又吸毒，唔需要咁Fit。〈但最後都無得出街會唔好失望？〉少少可惜，但我覺得最緊要有得做，因為我睇開美劇，佢哋製作比較真實，始終香港比較保守，好多嘢無咁逼真。」

其實除了黃子雄的「露股」戲份被刪，連迷你債劵苦主陳志健綁架周麗淇的戲份都完全被刪減。陳志健表示：「刪晒咩？我唔知呀，無人同我講。因為我最近都好忙，未有時間睇返。〈會唔會覺得好可惜？〉當然自己的作品都想喺唔同嘅平台播啦，但可以每個地方口味唔同，都無辦法，都要尊重公司決定。」雖然戲份被刪，但陳志健就透露這次和周麗淇合作得好開心，他稱：「今次係繼《女警愛作戰》之後再佢合作，Niki都拍得好辛苦，因為佢要黐黑膠紙，黐幾次都唔啱位，佢都無呻好專業。」