【後生仔傾吓偈】麥明詩唔覺做女人有優勢　馮盈盈：你唔好咁悲觀

最近一集《後生仔傾吓偈》又係玩兩性問答，陸浩明一開始就以「女生的優勢」做熱身題，第一個搶答嘅麥明詩話：「做女人有咩好？過十年就唔靚，咁有咩用？做有錢男人只會繼續有錢……」到底佢係擔心老定係擔心無錢呢？馮盈盈聽完之後，又表示唔多認同，更叫麥明詩唔好咁悲觀，仲例話自己去火鍋店拍劇時，本身想去買杯咖啡，老闆聽到之後，即時「變」出一杯咖啡俾佢，令FYY覺得呢啲就係女生的好處。

之後陸浩明講到男女在婚姻上的不同之處，例如女仔嫁入豪門就係少奶奶，但男仔就會被稱之為入贅，但瞬間又被麥明詩反駁：「女仔嫁豪門比人話，嫁唔到又比人話輸……」之後FYY講到情侶如果發脾氣或者吵架的話，多數都係女生會贏，因為既然拍得拖，就表示雙方都已經妥協咗，但麥明詩好似又唔多認同喎。「有啲男仔覺得自己地位比女生高，覺得自己價值、顏值、賺錢能力比女生高，就唔會重視佢，潛意識覺得呢個女仔最終都係揀我，就唔會遷就得佢咁緊要……」雖然麥明詩講到好似自己經歷過一樣，但佢就話好彩自己無呢個煩悶，純粹代入，係真唔係呀？！之後麥明詩又話情侶當過咗30歲之後，男方未必會再係主動道歉嗰一位。「我開始感受到朋友關係的逆轉，以前佢好想同女仔結婚，但30之後佢認為自己仲有得揀。」係呀，專麥明詩仍然係講緊「我啲朋友」
 

或者係因為FYY已經有個好男友，所以佢今集真係唔多發表，反觀麥明詩就未停過嘴，當問到「到底揀情竇初開定情場老手」時，麥明詩第一個舉行話會揀情場老手，原來並唔係男人不壞女人不愛，但其實都差不多：「我寧願佢係play boy，因為仲有機會從良，但如果情竇初開佢仲未play過嘛……」睇完呢集，都好想問麥明詩到底經歷過乜，點解愛情觀可以咁悲？