【開心速遞】博士唔止得Mandy一個　真人女友好到個個朋友都讚

無綫處境劇《愛‧回家之開心速遞》入面有好多對CP都好有人氣，其中一對就係馬貫東 (Mark) 飾演的秦博思與謝芷倫飾演的Mandy喇，有觀眾同網民甚至投入到話希望兩人在現實中都可以成為一對。不過演戲還演戲，於真實世界入面Mark其實已經有一位感情穩定的圈外女友Queenie Kwok，據悉，Queenie仲陪Mark走過了人生的低潮，Mark就曾於IG tag了女友表示：「天陰或天晴，有一對我們，不離亦不棄。」好冧㗎！

現在的Mark事業正值搏殺期，所以感情事都盡量低調，加上女友是圈外人，他絕少會主動談及女朋友，但每當訪問中被問到女友的事，Mark都難掩甜蜜之情，大讚女朋友好好。他接受《香港01》訪問時就表示：「我女朋友係好到我身邊認識佢嘅人都讚佢好好。對於我嘅事業發展，佢唔係淨係口講支持，而係用行動表示。開心速遞佢真係集集追㗎，有時我拉佢同周嘉洛佢哋成班一齊食飯仲會一齊討論劇情添。」

雖然劇中博士同Mandy係一對，但身為Mark真人女友的Queenie就完全沒有呷醋，Mark說：「外界話我向佢派定心丸，實情係佢向我打定心針至真。我驚有情敵，哈哈。」他透露是於今年年初與女友開始拍拖，女朋友內外在美兼備，Mark話：「佢靚㗎，素顏都靚。至於講工作忙啦喎，其實佢仲忙過我。不過驚有情敵嘅最主要原因係因為佢性格好，同咩人都傾得埋。」

一講起女朋友，Mark就讚唔停咁話：「我女朋友大學畢業，但佢從來無嫌棄過我學歷唔高。我英文唔好，普通話又好普通，佢都唔介意，仲主動話教我。佢覺得我人生歷練比佢多，即使學歷唔高，大家都可以互補。我最欣賞我女朋友聰明好學，但唔驕傲，對屋企人同朋友都好好。佢座右銘係：每個人都有佢嘅可取之處，唔好輕易否定一個人嘅存在價值。」就咁聽都覺得Mark個女朋友係完美呀，難怪他說：「100分滿分嘅話，我畀佢滿分呀！」

至於他的女朋友可有做過甚麼令他好感動的事，Mark即表示：「就尋日咋嘛，工人姐姐打黎話唔見咗衰仔（我隻貓），我女朋友一知道就放低晒手頭上嘅工作，飛的去我屋企幫手搵，仲交帶我家姐同工人姐姐唔好再whatsapp我，怕影響我開工情緒。好彩最後只係虛驚一場。」嘩，咁細心體貼的女朋友，去邊度搵？難怪Mark已經認定了對方，坦言已視女朋友為結婚對象：「不過目前先努力工作，唔係都唔敢開口叫世伯伯母交個寶貝女我照顧。」果然係個有責任感嘅好男人呀！