【非同凡響】余香凝為新片素顏上陣　觀眾睇到尾都認唔到佢

由金像導演歐文傑執導，余香凝、谷祖琳及岑珈其等主演的新片《非同凡響》將於10月上映，戲中余香凝不但作出新嘗試，放下靚女形象，以素顏上陣飾演寒背頹爆女學生，她還為電影獻聲、唱出電影主題曲《陽光普照》。

雖然電影還未正式上映，但主題曲《陽光普照》已率先有得聽，更成為她去年進軍樂壇後第四首個人作品，她表示︰「今次係第一次唱電影主題曲，導演搵我唱時，覺得好意外，因為自己上年仲係樂壇新人，冇諗過咁快，自己主演的電影可以唱主題曲，更加開心。」余香凝還大爆為主題曲錄音時的趣事︰「開頭試音時係高估咗我，因為太高音了，現在大家聽到的版本係降低咗五個key！」

提到這首新歌，余香凝希望可以跟電影一樣，為大家帶來正面訊息，遇到任何困難都不要忘記快樂︰「大家可能會覺得個天好唔公平，努力同回報唔同，會好灰心，埋怨個天，有時我哋追求緊一啲嘢時，會忘記咗快樂，但到最後你會發覺其實做人最緊要搵番初心，就係點樣去開心，最緊要係記得笑，就好似呢首歌咁，你個世界每一日都充滿陽光。」

講到今次電影中素顏上陣，余香凝直言當時一口答應，她笑言︰「導演初頭同我講唔使化妝，我聽後即刻答應，本身對自己皮膚嘅情況好有信心，素顏上鏡之前冇乜點試，但作為演員我冇咩所謂，就算個樣靚唔靚，要肥要瘦，或者專登化妝再醜化自己都好，我都ok嘅！最緊要係似番個角色，做到個角色就可以。」她又指有觀眾看了優先場後，認不到戲中那位就是她，反而令她感到高興︰「由我開始演戲，都想觀眾喺我每個作品都認唔到我，咁就最開心，證明我做嗰個角色做得似。」

此外，余香凝為電影特地重返母校「讀書」，重搭校園的感覺，不過已畢業7年的她卻於上堂時「瞌眼瞓」，她笑說︰「我以前係考會考，現在係DSE，每一堂都有好多好唔同嘅嘢畀你做，變番一個準備考DSE的學生，上一日堂真係超級攰，試過上堂寫緊短文時瞓着咗，支筆畫了一條斜線。」