有線娛樂新聞15年主播制成絕響 莫家淦最難忘食辣後做直播狂飆汗
「有線娛樂新聞台」於2003年7月28日正式啟播，是香港首個24小時的娛樂新聞頻道，曾經孕育過多位名主播，包括陳貝兒、區永權、黃翠如等等。幾過15年風雨，由最初24小時不斷播放，至2013頻道停播改為以節目形式《娛樂新聞》繼續存在，再由合共超過一小時的直播節目到如今每日只剩半小時的錄播模式，最後更全面「革新」，將於9月3日起以不設主播、不設廠景的形式繼續製作《娛樂新聞》這個節目。換言之，在周一（3/9，即2/9深夜）凌晨零時播出的《娛樂新聞》，將會是最後一次有主播報新聞（行內稱坐枱）。
前「一姐」陳貝兒憶述第一晚直播：腳都震埋！
上述提到的主播都是「有線娛樂新聞台」第一代主播，當中陳貝兒（Janis）更曾獲「有線娛樂主播一姐」之稱。於2009年離開有線電視、現為無綫藝員的Janis在聽聞到有線《娛樂新聞》即將無人坐枱後雖然大感惋惜，不過亦尊重舊公司的決定：「我係做幕前，唔係好識政策上嘅嘢。但嗰時真係令我學識好多，令我能夠好好裝備自己，畀我學識獨立。最難忘係第一晚，2003年7月28日開台第一次開廠做直播，當時仲要喺Times Square播，真係緊張到腳都震埋。」
莫家淦最難忘一次 食辣後坐枱狂飆汗
可能對很多觀眾而言，娛樂新聞坐枱主播的說話並非他們最想看的環節，有的更會認為這是無謂、無聊的「過渡位」。但對一班主持來說，這張主播枱絕對是最佳的訓練場，甚至是戰場。現為無綫藝人的莫家淦於曾2004年加入「有線娛樂新聞台」，他對有線娛樂新聞由衷感激：「我啲口才、即時嘅反應都係喺呢張主播枱度練習返嚟。好記得有一次，我同Paula（黃芳雯）拍檔做主持，嗰次我食完啲辣嘢，但做緊直播又唔去得廁所，但你知辣嘢嗰種萬馬奔騰，一路做廠一路飆汗呀！」
黃芳雯感慨：公司有呢個改革我好理解
主播一職為黃芳雯（Paula）建立了不少珍貴回憶，2008年加入有線至今期間，她去過威尼斯影展、訪問過多位天皇巨星、結識不少圈中好友，豐富了人生閱歷，至今依然記憶猶新，節目走到現在，Paula份外感慨：「仲記得我第一次坐枱係同嚴崇天一齊。但隨住時代嘅進步，網絡世界、即時新聞嘅出現等等，世界不停轉變，所以公司有呢個改革，我可以理解。」
末代主播嚴崇天曾望改革
直至近代，娛樂新聞的主播已所剩無幾，嚴崇天、鍾煒喬、詹可琳，以及最新加入的植詠珊和馬梓軒成為「末代主播」。當中曾離開過再加入有線的嚴崇天份外感到唏噓，只因他見證着娛樂新聞由盛世回落：「冇辦法，𠵱家用電話睇新聞又快又齊。其實我諗過希望可以轉一轉個模式去做新聞，例如好似韓國咁，娛樂新聞唔係就咁報，可能會搵一啲藝人上嚟玩住遊戲咁報，不過呢個又牽涉較大嘅成本。」
詹可琳成「最後主播」：會跟觀眾講再會
其實主播之位實得來不易，阿Matt鍾煒喬亦曾為當主播而用功苦練：「好記得我初初入嚟做記者，有上司話我連中文都講唔好所以唔適合做主播，於是我每日都讀報紙去練習咬字。」9月3日（2日晚）凌晨零時的《娛樂新聞》是最後一次有主播報新聞，將會由加入有線2年、抱着不捨之情的詹可琳擔此重任：「最難忘係頒獎典禮大家一齊追賽果直播出街嘅時間，真係好緊張。（最後一晚有咩想同觀眾講？）會多謝大家一直以嚟嘅支持，再會。」
這些廠景，即將成為歷史的痕跡。點擊放大：