【港姐2018】與工藤佑采交換頭像　張敬軒認兩人關係「特殊」

雖然《2018香港小姐競選》已經塵埃落定，冠、亞、季軍分別由陳曉華、鄧卓殷和丁子田獲得，不過風頭最勁的卻是落選的中日混血兒工藤佑采，全因為她無緣晉級後即黑面到完場，而其悲慘身世亦令網友黯然神傷。最近，張敬軒便在社交網站中與這位落選港姐交換頭像，搞到好多網友都質問兩人有何關係，軒仔今日（30日）在中環出席品牌活動時便詳細解釋兩人的「神秘關係」。

到底軒仔與工藤佑采到底有何關係？軒仔接受《香港01》訪問時笑說：「我同佢係網友關係，其實仲未有機會真正見面認識佢，但我睇佢選美過程幾有趣，同一張相唔同人有唔同解讀，有人話佢黑面，我自己係覺得無論佢跳甩舞步又好或者小提琴有差錯又好，最緊要有型，我覺得特別係做我哋呢行啦，咁當然我覺得佢音樂同跳舞仲要苦練，但係我見佢跳舞時候好似見到自己影子，因為永遠都慢一步，我覺得幾有趣。」所以才把工藤佑采的靚樣換成自己社交網站頭像，但沒有想過有如此迴響。

問是否知道工藤佑采的社交網站專頁亦轉用了軒仔樣子為頭像？軒仔即指知道，更謂整件事很有趣：「我都立即Follow返佢，我亦有睇佢一啲報道，我覺得佢好有自己諗法，同埋你問，係一個咁嘅年代大家都用同一個方法生存時候，點解你唔可以唔同少少呢？我覺得佢係一個好好例子，我哋生係一個大潮流岀嚟，點去保有自己方法呢？我哋娛樂圈好多時候都會遇到我唔係好情願做嘅事，但為大局著想要去應付你嘅工作，其實保返少少黑面都幾好呀。」軒仔又力撐工藤佑采最多都只是黑面，又不是去罵人。

二人成為網友後，問他們有否私下交流？之後又可有機會合作？軒仔直言：「而家暫時都未有機會，希望將來可以有合作，我見佢對答問題都幾爆幾好笑，下次可以睇下大家一齊玩乜。」