片酬多條件好梁朝偉仍辭演《如懿傳》　 劉嘉玲：佢覺得唔適合！

劉嘉玲身穿金色珠片貼身連衣裙出席護膚品牌活動，霸氣十足。嘉玲姐多年來保養得宜，不時都有網友在她的社交平台留言問她美容秘訣，她日前就公開自己從不用防曬，令人驚嘆不已，她直言：「我係唔防曬，因為我爬山又跑步，如果我搽防曬，又出汗我又要抹，不停抹又不停補，我覺得做唔到。其實做運動係對皮膚非常之好，勁過防曬，嗰啲細胞會令到你好開心。」

對於有傳嘉玲姐不願老公偉仔與兩位緋聞女友周迅和董潔同台，而要偉仔放棄出演《如懿傳》兼1.6億人仔片酬，她笑言：「我好開心大家對梁朝偉依然咁厚愛，咁多女仔鍾意佢。我有呢個話事權，但我唔會用。我好尊重他的決定，尤其是工作，因為咁多年嚟，除了搵佢做乾隆亦有好多有好好製作的電視劇同真人秀搵佢，條件又好、錢又多同舒服，佢都推咗，因為佢覺得唔係咁適合佢。」嘉玲姐又笑言偉仔可能有拍劇恐懼：「可能佢細個喺TVB度拍嘢拍得太多，太辛苦所恐懼咗，佢話就算好多錢都冇命使，咁我都覺得啱嘅。」

至於偉仔日前受訪表示想花更多時間陪家人預告會「半退休」，但嘉玲姐則表示未想放慢腳步陪伴偉仔左右：「每個人追求都唔同，佢鍾意慢生活，我好尊重佢。但我好鍾意探索生命一啲新嘅嘢，佢都好尊重我，開心最緊要。（你想佢退定唔想佢退？）我覺得佢係一個天才演員，加埋佢後天比咗好多心機去做，係好難得嘅演員，我希望佢唔好退休。」

同場仲有多位藝人包括徐子淇、佘詩曼、宋慧喬、泰國女星Pancake等，勁多靚相。