利穎怡攻內地拍網大《奪命追兇》　拍喊戲瘋狂飆淚過足戲癮

利穎怡（Joan）除了經常參與《東張西望》外景拍攝，亦不時在無綫劇集演出，最近她便衝出TVB，嘗試到內地拍攝網絡大電影。在最近上架的《奪命追兇》中，利穎怡便飾演一位新興教派領導者（區軒瑋飾）的妻子，更因為其丈夫突然離世，而被視為嫌疑犯。與此同時，她亦成為了新任新興教派領導者。

問角色是否難演，利穎怡接受《香港01》訪問時便透露有一場喊戲特別難做：「我演之前就設計咗係默默流淚嘅，但係做完之後，導演就話想我狂喊。本身我都係一個好容易就喊嘅人，但係可能係因為霎時間要轉設定，臨時喊唔出，嗰時好驚！好彩導演好好，好有耐性，最後轉機位之前都順利瘋狂喊到收唔到聲！」記者笑指拍網絡大電影好好搵，利穎怡即否認：「唔係啦，最緊要係過足戲癮。」