佘詩曼否認片酬得二百萬人仔　有興趣接演《延禧攻略2》

佘詩曼近日憑內地劇《延禧攻略》飾演「嫻妃」一角，在兩岸三地再次人氣急升，今日（29日）她返港與劉嘉玲、宋慧喬、徐子淇等出席護膚品牌活動。身穿以裸色為主色雪紡連衣裙的阿佘就表示女人一生中最大的職業就是扮靚，所以自己都會花大部分時間護膚，至於美容秘訣就是飲果汁。

對於自己演技備受讚賞，甚至有網友稱「阿佘連手指都在演戲」，她聞言：「我好開心亦都好多謝大家對我嘅讚賞，我記得去年拍《延禧》嗰陣都好熱，個個都好辛苦但依家有咁好嘅成績，台前幕後都好開心。（演繹上有無遇到困難？）用國語去演戲，可能電影都可以掌握，但電視劇70集就比較難，因為始終唔係自己嘅母語。開頭我都有試過用國語講對白，但最後我唔想因爲著重對白而疏忽我本身的戲，所以我就放棄，橫掂都有配音。所以我尾句用國語，等對手可以接到。」

對於有網友好奇「嫻妃滅一個人剪一盞燈」，當中七盞燈中滅了六盞還有一盞未滅，究竟是皇帝、太后還是女主角瓔珞，阿佘就古惑稱：「睇下你哋想邊個囉。」

至於《延禧攻略》的監製于正就在微博公布會開拍《延禧攻略2》，阿佘就稱未有收到消息：「我未聽聞過，如果有都想參與。（會唔會加片酬？）仲加呀？其實我想講如果你咁樣問即係相信傳聞（二百萬人仔片酬）。其實聽完就算啦，你哋問我係咪真，我會答邊有可能呀！」阿佘又稱當時收到劇本，僅僅用了兩天就看完劇本並答應接演。