陳奕迅恭賀歐鎧淳等港隊亞運奪銀　意外引發中港罵戰勁無奈

今屆亞運會香港隊表現相當理想，作為香港人為佢地打打氣本屬理所當然，有邊個估到咁都要俾人鬧先得架，仲要唔係一個人，係一大堆人留言圍剿。23號晚女子4X100米混合泳接力決賽中，由於中國及韓國先後被DQ，令歐鎧淳、楊珍美、陳健樂、鄭莉梅補上，為香港摘得銀牌。陳奕迅留言道賀，點知惹來大批簡體字同繁體字留言對罵，好地地一個恭賀POST成為戰場。

女子4X100米混合泳接力決賽中，香港隊在原本第2的中國及原本第3嘅韓國分別被取消資格下，以4分03.15秒奪得銀牌，為近24年最佳成績。Eason於IG貼上港隊4位女將賽後擁抱喜極而泣照片祝賀，獲得以背泳打頭陣嘅歐鎧淳回覆。

一件開心事點解變質？碌返最早嘅留言，見到有位網友用簡體字寫上：「尋晚我睇咗，中國隊和韓國隊犯規淘汰，香港隊攞咗第二，不過我哋都系好高興，因為系中國香港阿嘛。」就係呢個咁「大愛」嘅留言，引來網友不滿，為罵戰揭開序幕。「輸左就香港，贏左就中国香港」，「神邏輯，香港運動員真心靠自己，連香港政府都少支持」，當然又有一堆簡體字留言還擊啦，留言頗多粗言穢語就不多舉例啦。話時話，內地上IG好似要翻牆，千辛萬苦去Eason主場同人對罵，內地網友果然相當神心。