【港姐2018】泳裝問答環節　20號鄧卓殷將農夫改名變「播種的機」

《港姐2018》終於進入高潮環節，在Foul走8位佳麗後，只剩下最後12強。而且由於節目相當緊湊，所以立即就進入泳裝環節，講起泳裝，大家都知道一班佳麗除了要著泳衣之外，仲要面對主持一些難以抵擋的問題。第一輪頭四位佳麗面對著Do姐和蕭正楠曹永廉兩兄弟，可能兩位男士主持經驗未算好多，問題都不算太刁鑽。

不過之後4位佳麗就慘喇，佢哋除咗繼續要面對Do姐，仲要換咗麥明詩馮盈盈兩人上場，係人都知佢兩個講嘢一向十分銳利，結果11號李明芙一嘢就俾佢哋問到口啞啞，條問題就係：「如果今晚除咗你自己，有邊一個佳麗贏咗係唔公平？」一聽到呢條問題，佳麗立即呆咗，之後諗咗幾秒都答唔出。不過諗諗吓，佢突然一開口就答咗句：「係Honey…」嘩！開埋名，Do姐即刻幫拖叫佢唔使開名嘅，呢個時候麥明詩仲唔放過呢位佳麗，話Do姐唔公平幫手。Do姐也不是省油的燈，一嘢就話：「你都係香港小姐喇，咩唔公平啫？」之後仲教李明芙應該點答問題，好彩有Do姐咋！

最後4位，主持繼續有Do姐，再換上老配搭農夫，一睇就知會笑爆咀。連Do姐都話農夫嘅問題十分精彩，不過唔只農夫好笑，20號鄧卓殷都好好笑，農夫話要幫佢哋改個新名，佢竟然話係：「播種的機」，連Do姐都忍唔住笑。至於講要改Do姐花名時，就話係「香港一姐」，唔只搞到笑，又識得大體，勁呀！