【後生仔傾吓偈】麥明詩狂爆另類性暗示　博士級馮盈盈都接唔到口

因為《後生仔傾吓偈》關係，令唔少人都知道馮盈盈充滿了黃色底子，不過，原來十優港姐麥明詩嘅黃底都唔弱，最新一集以「港日兩地聯誼攻略」為題，並請來日本達人周奕瑋（Jarvis）做嘉賓。節目一開始，陸浩明問到「約會異性的方法」，馮盈盈就搶答表示搵男友介紹同事係最好，結果即時引起麥明詩不滿：「佢講咗九個月啦，我上星期真係燥咗底，你知唔知道timing好重要……」言語間，完全感受到麥明詩有幾dry同幾急。

周奕瑋於節目中提到日本人約會時嘅文化，提到「勝負內褲」時，陸浩明就叫大家估吓到會是什麼類型同顏色，馮盈盈估計會係有蝴蝶結，並且粉紅色為主，而麥明詩就話跟據過往睇過嘅日本成人影片經驗，「勝負內褲」應該會係白色。答案開估時，周奕瑋忍唔住講咗句「你都睇得幾多喎」無錯，佢係講緊麥明詩……
 

之後眾人討論到「如何暗示去酒店開飯」，馮盈盈就估「好似趕唔切尾理車」，而麥明詩就話「煮個麵你食」，當大家都覺得幾理所當然時，麥明詩再細細聲咁補一句「等你食……下麵」畫公仔畫到出腸，全埸即時暴動，相信大家都係因為估唔到麥明詩對「飲食文化」都咁有研究，馮盈盈更忍唔住問「係未食鮑魚麵」，而陸浩明就好努力咁去打完場，話「我請你食吓麵」，仲叫大家唔好心邪，而指下麵的意思係放下落個煲煮，已經紅都面晒嘅麥明詩就好認真咁用國語講多次「下麵給吃你」，仲話喺台灣大家都會咁講……