卓韻芝婚禮細節顯心思　墨綠燙金喜帖超有氣質

女孩子出嫁當天就如夢想成真一樣，希望自己有個完美嘅婚禮，唔少準新娘會投放無限心機，希望婚禮每樣事物都係獨一無二，卓韻芝都唔例外。9月15號阿芝就會下嫁從事電影美術工作嘅梁子賢，連日來準新娘於IG分享各項細節，除咗別樹一格嘅綠色喜帖，原來連結婚戒指阿芝都係親手打造﹗

禮物心意比價錢更重要，下半世日日要戴嘅婚戒，阿芝拒絕揀選市面上大路品牌款式，決定自己戒子自己造﹗佢上載多張相片及短片，見到阿芝相當留神親手打金：「結婚介子親手造；同一條白金出兩杖指環，特有意義﹗原來過程不簡單，將紋理鎚打出來，不過重要關頭要請師傅出馬，之後還要電鋸美人。未打磨所以像銅，成品暫時賣個關子。」

兩公婆日夜戴嘅婚戒要親手造，派到每位來賓手上嘅喜帖，阿芝都落足心機設計。捨棄大路嘅紅紫喜慶顏色，亦拒絕近年大熱嘅西式水彩風格，阿芝揀選墨綠色作為喜帖主色調，厚身卡紙印上燙金字體，相當大氣。帖封用上代表新人名字嘅「CHI &YIN」火漆蠟封章，而帖內阿芝仲加上小心思：「內有送給各位的詩，那詩我一直改，往來了很多次，勞煩了，慢用。」難怪俞琤許鞍華等收到喜帖時都愛不惜手啦。