周慧敏渡過50歲後不敢違抗自然定律 「渴望優雅地老去」
撰文：賴家杰
出版：更新：
周慧敏（Vivian）早前忙完巡迴演唱會後，現在處於休息階段。正在忙演唱會期間，眾多粉絲不停在Vivian社交網站講佢太瘦，需要增肥，令到Vivian有增肥嘅決心，「我乖乖地聽佢哋講去增肥，我上鏡嘅話，好似前一段時間咁瘦係適合，因為上舞台都要瘦，其實我上鏡係會肥十倍，所以我要比正常人更加要瘦，但係宜家可以休息，咁我可以盡情食，足足肥咗5磅，現在大概105磅，到年底巡迴再開始，又要減少少先可以著得落演唱會嘅衫。」
近年Vivian不停被大家稱為不老女神，Vivian直言覺得網友們係誇獎佢，「其實我多年來係有變化，咁我過咗50歲，希望將來可以優雅地老去，咁就OK，我唔會挑戰自然定律。」當然大家想知道Vivian多年保養秘訣，Vivian笑言做運動可能係原因之一，但重點要保持開朗態度，呢一點旁人會從眼神可以觀看到。
Vivian間中會於自己社交網站Post當年年青時候照片，引起大家熱烈討論，Vivian咁做原因係為30週年演唱會要回顧一下，令到Vivian想當年。問到入行多年，Vivian最喜歡哪一個階段嘅自己？Vivian直言準則同其他人唔一樣：「我每個階段都有好珍貴回憶，而我學到同得到嘅事，累積下來先可以成就今日嘅自己，所以我冇話最愛或唔愛哪一個階段，我只想講活在今天要珍惜當下，能夠處理好現今事情已經好唔容易。」