【廣告女皇】曾任選美評審　倪晨曦見盡佳麗鬥爭：批踭爭位一定有

人氣女神倪晨曦（Elva）近日擔仼ViuTV全新節目《Good Night Show廣告女皇》評審，Elva直言為參賽者評分，不單些看才華：「我要睇佢哋認真嘅程度，另一樣睇佢哋嘅為人處事，呢項都會佔我評分好大嘅一部份，點解我要咁講呢？因為我之前都做過選美評審，做其他比賽評審我睇到好多，睇到有啲女仔競爭心好大，太想贏，佢哋會做一啲事令人唔舒服或者佢哋好勢利，我會覺得一個女仔係唔係真心對人好好，人品呢樣好重要。」言即批踭、爭位是否經常發生？Elva笑言：「其實一定會有，或者大家爭企中間，影相要好突出，或者對工作人員態度唔係咁好。」

問Elva當年參加選美的時候，有沒有發生遇到類似情況？「當年唔覺得有，當時加拿大參加比賽，好多年前，大家都好單純，唔會發生呢類型情況，但事後有工作人員同我講有啲女仔唔係我想像中咁友善，私底下唔係咁好，但我參加比賽時我覺得所有人都好好。」Elva更指自己本身不好競爭的人，不會因為落敗要大喊大叫。

今日（15日）Elva 31歲生日，生日正日都要開工，係因為乜呢？係因為太過熱愛工作？Elva坦言生日開工係一件開心事：「可以大家一齊唱歌，加上我之前返完多倫多，同孖生妹妹一齊食蛋糕同慶祝生日，其實已經好滿足。」除了跟孖生細妹慶祝外，問到男朋友有沒有表示？她透露昨日已經同他及一大班朋友食飯，「其實佢唔需要點送禮物畀我，不過佢送咗鬆池熊嘅禮物畀我，因為我好鍾意，佢都做咗少少心思，喺食飯地方佈置好多事，我覺得有呢份心已經OK。」