【森美旅行團】孖住丁子朗浸浴　 森美：毛巾遮住嘅地方我強過佢

森美今日（14）現身紅磡「時光倒流打工仔」活動。無綫旅遊節目《森美旅旅行團2》昨晚首播，節目中森美單飛從多角度介紹日本京都地道美食，未見三隻娃鬼麥美恩、吳若希、丁子朗隨行。

森美表示：「因為好多人睇咗第一輯，好多人話好想睇我一個人呀，因為呢個喺旅遊節目，當我一個人時，就會講好多地道文化，我好鍾意食啲乜嘢呀，好似琴晚𠴱集講食蛋嘅，好多人平時去旅行唔知嘅，京都玉子蛋做嘅味道清淡啲啦，東京做比較甜啲濃啲嘅，如果有佢地喺度，就會成大班人喺度玩，玩嘅時間會比較多，所以好多人想只想睇我一個人做節目，所以頭集同尾𠴱集，都會安排我一個人做。」

今晚呢集《森》預告片，見到兩位型男丁子朗同森美在鏡頭前大show肌肉，赤裸亮相浸浴，因尺度問題重要部位打咗格仔，觀眾冇緣一睹雄風。森美笑言：「我只能夠講電視尺度唔能夠講太多，人哋點浸浴，我哋就入鄉隨俗點都要啦，我望住阿啷啷（丁子朗），我只能夠講，我喺毛巾遮住嘅地方我Fit過佢，毛巾以外佢Fit啲。我身型冇丁子朗咁Fit，我拍咗呢個節目肥咗10磅，好在我係拍飲食加遊玩節目，所以相比齋拍飲食節目好好多。」