黎諾懿感激鄭伊健義氣相助：我哋嗰種情，一見面就係兄弟！

憑住無綫處境劇《愛‧回家》飾演馬壯一角而人氣爆升的黎諾懿，近年在電視圈愈撈愈掂，去年更正式躍身成為TVB一線小生於多套劇中擔演男一的角色。不過他之前接受訪問時都有講過，自己入行以來絕非一帆風順，有霉過窮過捱過，亦曾經住過劏房，甚至要食麵包同即食麵度日。他日前接受電台訪問時，就重提呢段辛酸史，還特別多謝好兄弟鄭伊健於當年幫助過他，又大爆了兩人之間的一個秘密。

諾懿在訪問中透露他和伊健是經另一位朋友認識的，他直言﹕「我真係要好感謝鄭伊健喺我身邊出現過。我要透露一個秘密，喺我最霉嘅時候，伊健會叫我去佢屋企揀衫，因為佢好多衫都只係着過一次，着完就會送俾我。佢仲話：『嚟啦！啲衫我都唔要，過嚟揀啦！我淨係喺大陸着過，香港唔會知嘅。』佢真係好似一位大哥哥關照住一位小朋友嘅成長一樣。」伊健果然好夠義氣！

諾懿話當年他與伊健兩人由一起去滑水，到後來一起拍劇，還會一起打羽毛球，成為了多年的老友。不過近年已好少見面，他說：「到咗今時今日，或者我哋依家係比較少見面，但嗰種情，一見面就係兄弟！」有指諾懿更一手撮合了伊健和蒙嘉慧，唔通是為了報恩而給伊健送上蒙嘉慧做老婆？諾懿表示：「佢哋係經我介紹一齊打羽毛球而認識嘅，但能夠走埋一齊係佢哋嘅緣份。」

黎諾懿住過劏房麵包吊命 5億駙馬都捱過窮：人生唔應該順風順水