《BB來了》楊卓娜型金牌陪月需兼家庭輔導　真分地獄天堂兩大派？

楊卓娜在無綫劇集《BB來了》中飾演一名金牌陪月，其金牌的由來並不單止是她對初生嬰兒和坐月媽媽照顧得無微不至、又是頂級催乳師、又是湯水專家......等等，但其實她最厲害是將李佳芯家中問題逐一化解的能力！例如佳芯老公黎諾懿的產後抑鬱、佳芯與盧宛茵的婆媳糾紛、盧宛茵與佳芯媽媽陳秀珠的水火不容......等等，堪稱是神級陪月！
但到底現實中的陪月又有否需要去幫助解決家庭問題呢？

「現實啲講句，化解家庭糾紛，都係想個工作環境好啲啫！」
擔任過十幾年陪月、現為中介公司老闆的陪月達人Sarah表示：「現實中嘅陪月雖然未必每個都及得上劇入面咁犀利，但唔多唔少都會關心吓太太嘅狀態，因為太太好，工作先做得順暢。」

而Sarah亦提到現實生活中的陪月主要分成兩大派系（並非地獄陪月和天堂陪月。誤）一種是道理型，一種是人情型：「阿B同太太以外嘅事，幫就係人情，唔幫就係道理。」

唔幫係道理？

Sarah：「其實大部份嘅陪月合約都寫到明陪月嘅工作範疇係唔包括日常家務，以及先生同埋家人嘅膳食。咁有啲好叻嘅陪月好有原則，真係會跟足合約做，唔做多，亦都絕對唔會做少，只要係阿B同太太嘅事無論係洗奶樽呀！煲湯呀！幫阿B同太太沖涼呀等等，所有技巧都係好好，不過佢哋就係唔會做多。日常嘅家務佢哋唔會掂，就連如果先生想食飯嘅話，都只會喺太太嘅餐單上面加大份量，絕對唔會為先生煮額外嘅食物。」

如果是這樣的話，又未免太不近人情了吧？Sarah並不同意：「無辦法！其實佢哋都係保障自己啫，萬一喺做合約以外嘅嘢出咗事咁點算？到時就怪邊個都唔係喇！同埋陪月嘅聲譽好重要。」

不過Sarah自己其實是屬於人情派：「我成日都覺得，太太同阿Ｂ嘅功夫基本上都做得晒，咁唔通真係坐喺度咩？就算真係唔想幫太太做日常家務都好啦，我自己都會同太太傾吓偈，未必一定係要太太唔開心先同佢傾偈嘅，聽吓太太分享自己嘅心情又好，傾吓閒偈都好啦！建立關係好重要，如果同太太關係好，信任程度高，咁工作自然就會開心又順暢。」

男人都可以做陪月？

最近有網民就好奇，為什麼在每集《BB來了》片尾的育嬰資訊會跑出一個男性的資深陪月顧問？難道男性也可以做陪月？Sarah笑言以她所知沒有男性陪月：「調返轉頭諗吓就知，陪月要幫太太沖涼，身體接觸在所難免，你係男人會唔會大方到可以畀另一個男士去做呢個工作呢？不過我知道內地有男士嘅催乳師，（什麼？）佢唔係用按摩嘅，佢係用針灸，所以話中國嘅醫術真係博大精深！」