趙希洛入行10年　終獲賞識做親生女：公司終於見到，係一個新開始

大台藝人一個接住一個完約後離巢，單係呢幾個月就先後有岑麗香同林夏薇，不過，舊嘅唔去新嘅又點會嚟呢！有消息指現年23歲嘅江嘉敏以及被網民封為「無綫御用癲婆」嘅趙希洛趁機上位，8月開始正式轉做親生女。

趙希洛07曾參選港姐，雖然於五強止步，但她隨即加入無綫藝員訓練班，多年來一直飾演閒角，直到《超能老豆》終於榮升第二女主角，及後在《乘勝狙擊》則飾演千面女郎蘇麗芬，不時大晒身材益觀眾。趙希洛接受電話訪問時，對於轉簽做親生女一事，第一個反應係：「嘩！又會咁快知嘅！點解會知嘅！我無同人講過架。」她承認已成為親生女，但就不肯透露合約內容以及有否加薪，問到是否樂小姐親自出馬，趙希洛就話都係人事部同事負責聯絡：「不過佢哋有話係樂小姐想搵我。」

入台10年正式做親生女，趙希洛表示感覺不大，笑言「一係簽一係唔簽」，並謂向來都不強求做親生女。「我唔係起步就已經有運，所以一直都好努力咁工作，依家想中文再好啲，同埋用心做每件事。」她又表示除了拍劇之外，最想嘗試能講英文的角色，因為這對鬼妹仔的她有一定好處。趙希洛早年於英國大學讀法商科，爸爸經營石油生意，媽媽則為前資深藝員梁小玲，有指父母對她入行十分反對。如今獲樂小姐點名簽做親生女，是否對父母有所交代，趙希洛表示仍未通知父母。「係做到啲成績，咁多年努力公司終於見到，亦可以話係一個新開始。」
 

而去年因《親親我好媽》而知名度大增的江嘉敏，雖然有傳佢因拍加入大台前，曾參與ViuTV劇集《三一如三》而激嬲方仗被擺入雪櫃，但事件好快就過告一段落，且公司力捧，於新劇《兄弟》更擔正做女一。對於被簽做親生女一事，江嘉敏接受電話訪問時就話：「我一入嚟就已經係親生女。」問到她最近可有做續約的動作，佢就話：「我諗你短期內都會喺呢間公司見到我」並再三強調自己係「一入嚟就已經係親生女。」