【范文雅．專訪】棄銀行筍工來港追夢 積蓄使晒：頭三個月晚晚喊
由《三日兩夜》再到《楝仁的時光》以及現在熱播的《BB來了》，范文雅（Aliya)都是以性感作為賣點，或者大家覺得性感好容易，著少些布，拉低件衫就可以，但其實無綫有近百位女藝員，要有機會給妳表演性感都不是易事，范文雅2012年選完華姐後，在澳洲有銀行工，薪高糧準不做，反而來香港捱四年，才有機會拍《三日兩夜》，到第六年終於有機會在《BB來了》有個讓觀眾留下印象的配角角色，她說:「決定留喺香港發展嘅頭三個月，我晚晚匿埋自己喊……不停問自己究竟我行呢條路啱唔啱呢…..」
選美落敗 從回起點
香港娛樂圈對Aliya來說是一個充滿夢想的地方。在墨爾本贏得華裔小姐冠軍，來到香港參加國際華裔小姐競選，可惜最後與獎無緣，Aliya又回到起點，在銀行裡繼續沉悶工作。有一天，Aliya在工作期間，收到TVB打來邀請，范文雅就決定來港發展，她說：「份工真係太悶，我唔想成世都係咁，爸爸媽媽係反對，覺得我有份咁穩定嘅工作，況且香港一個親人都冇，驚我好難捱得住。」家人反對是合理的，范文雅是澳洲蒙納士大學風險投資管理的碩士生，在澳洲銀行做顧客服務主任，一定穩陣過在無綫捱騮仔。
追夢總會遇到挫折，范文雅很快遇到，就是經濟壓力，來到無綫沒人識，工作量近乎零，儲了近20萬的積蓄很快就用完，加上思鄉情懷湧現，令范文雅每日都喊，喊了近三個月，她說:「喺呢段日子裡，因為嚟到一個陌生嘅地方，冇朋友，冇親人，好多野都由零開始，頭半年過得好辛苦，好唔習慣，自己好唔開心，遇到問題又冇人可以傾訴，每日喺度喊，反覆問自己，究竟我行呢條路啱唔啱，最終同公司攞咗一個月假，返咗澳洲搵Daddy媽咪，最令我最難過嘅，係我見到父母嘅時候，佢地同我講：「無論發生任何事Daddy媽咪都會支持你，無論經濟上，無論你唔開心，你都可以返嚟呢個屋企。」
范文雅給人感覺熱情，但其實相當慢熱，家人在她心目中佷重要，一問到父母，范文雅亦不禁落淚：「其實係香港咁多年，Daddy媽咪係經濟上一路支持我，自己啲積蓄都用晒，佢地對我無限嘅愛，無論我做咩都好，我要喺呢行再堅持落去都好，佢哋都話會繼續支持我，因為佢哋知道呢一樣野係我想做嘅嘢，就算我唔開心，佢哋都安慰番我，『有Daddy媽咪係度，萬一你選擇唔做呢行，你都可以返屋企。』呢句說話令我好感動。」