【不可思議的媽媽】蔡少芬親見女兒懂得分享：佢兩個令我好感動

蔡少芬(Ada)今日出席荃灣化妝品牌宣傳活動。已是兩女之母，皮膚依然亮麗白皙，不單止她有護膚心得，原來成家都很貪靚，她說：「每日都會搽精華素，搽面霜保濕，我個女都會攞我啲護膚品用，都會畀佢搽少少，始終小朋友用啲比較溫和產品適合啲，連我老公都用我啲護膚品用，哈哈。」

早前Ada上內地綜藝節目參加《不可思議的媽媽》帶同兩位愛女亮相節目。「我上呢個節目，好想趁呢個機會，拍低同兩個女相處嘅回憶，我之前睇過呢個節目，好用心為小朋友，編排得好好，我成日都好想有幾部機跟住佢地，佢地去做一啲野，而佢地又唔識得處理，但我又放手交畀佢地，有啲哥哥姐姐跟住佢，我就可以安心囉。」Ada又話：「好似拍攝時有一幕，見到阿妹跌咗杯雪糕，家姐走過去同阿妹講：「我畀你食呀，我地齊食呀。」原來我睇到佢地兩個相親相愛。」

小朋友日漸長大，做父母親需要為小朋友培養價值觀。「我會同大女講，我會鼓勵佢，你睇一本書我就會畀一蚊你，你去旅行有幾多錢，就用幾多錢買嘢，家姐就會好用心去睇，希望佢用自己嘅能力，學到野又可以賺錢。」